曼聯嘅前鋒朗尼雖則唔靚仔，但就鬼咁百變，好似喺前日反勝韋斯咸4:2場英超，佢就化身做爛仔，喺入波之後對住個電視鏡頭幾億觀眾面前係咁爆粗；不過走出球場就搖身一變做電影明星，扮《油脂》入面嘅揸住煲茶（尊特拉華特）大跳勁舞，真係冇人夠佢玩。
入波爆粗事後道歉
今季鬧入球荒嘅朗尼，喺前日贏韋斯咸4:2場英超大發神威連中三元，聯賽入球終於去到10球。唔知係咪興奮得滯，佢喺入第3球之後，竟然走到鏡頭面前，一連串講啲F字頭嘅粗口，完全唔顧自己英超球星嘅身份，搞到成個爛仔咁。賽後佢都知衰，立即作出公開道歉，佢咁話：「我要向俾我嘅慶祝入球方式冒犯嘅人道歉，特別係當時睇緊波嘅家長同埋小朋友。」不過佢喺億萬電視觀眾面前爆粗，英足總就話明一定會做嘢，佢極有可能喺今日被控告為球賽帶來不名譽，要坐波監或者罰錢。
朗尼爆粗雖則有手尾跟，不過佢喺周中歐聯8強大戰車路士之前入3粒，狀態fit成咁，領隊費格遜開心都嚟唔切，其他嘅嘢之後先處理喇。
派對扮《油脂》high爆
話時話，朗尼喺場內做咗爛仔王，但喺場外就做咗舞王。英國傳媒日前爆料，話佢喺同高蓮結婚之前，參加喺曼聯隊友布朗屋企搞嘅化妝派對。當時朗尼同埋高蓮揀咗扮經典歌舞片《油脂》嘅男女主角揸住煲茶同埋奧莉花紐頓莊嘅造型。知情人士話：「朗尼同高蓮搶盡風頭，而且都玩得好開心。當時戴假髮同着黑色皮褸嘅朗尼，仲好唔怕羞咁展露佢嘅歌喉，得現場人士鬼咁開心。佢哋好恩愛，仲十足一對電影明星。簡直就係天作之合。」
噚日係高蓮25歲生日，唔知朗尼會唔會又扮揸住煲茶，等高蓮有個意外驚喜呢？