I-Mego來自美國音樂潮人手筆！入門價喪玩中高檔音質；最重要係重Bass口味，搭iPhone，聽POP、Rock、R&B一概年輕主流音樂最啱玩，不過最煞食都係佢個搞嘢外形，實力派同偶像派二合為一，80後唔入貨點得？
記者：王震遠
攝影：伍慶泉
Model：Fiona@Inspire
華仁影音（27877992）
80後 潮聽懷舊峯
美國空運到港I-Mego，明顯係走YoungLine，以往唔過千元，好難搵到靚耳仔，佢明顯睇住呢個空檔嚟玩！
Retro係主攻系列，懷舊咪高峯造型，上手第一個感覺，就諗起羅文唱《激光中》支咪！耳筒行40mm全音單元，頻率效應支援20Hz至20kHz；試聽報告，音色開揚，無壓迫感；可能預咗o靚界玩家愛用iPhone聽歌，低音份外有力，聽Rock同R&B至合拍；機身偷得幾輕吓，可以舒服、長時間佩戴，完全合晒機不離手嘅80、90後胃口！
三色唔同玩
好色係人嘅天性，但玩Retro唔可以憑顏色喜惡嚟揀！三色耳筒雖造料相同，但上架前分別經微細Tune過，以適應唔同玩家口味；紅黑辣版叫RetroInfinity，高中低音、屬樣樣平均類型，雖然無乜個性，但適合乜都聽吓嘅一般玩家；簡約白RetroClassic，低音會略減，聽開Classical、舒服嘢玩家至啱；懷古啡HeavyBeat，一如其名，玩低音拳拳到肉，用嚟聽HipHop同Rock歌份外入血！
Look爆 重Bass
耳筒除咗聽歌，家亦列為潮人指標，掛得上身當然要有潮爆Look！I-Mego另一條平價入門Line，主要係玩樣，螢光同臉譜系列都各有特色！
螢光系列大玩幾種Sharp到養眼嘅顏色，格仔圖案，用嚟襯板仔Look一流！臉譜雖然係吹中國風，但構圖反而帶點美國Feel，黃皮白心、襯淨色Tee就啱晒！兩系列基本用埋同一份餡，貫徹牌子風格、玩重Bass，聽Pop嘢不過不失，不過我更愛用佢嚟玩造型、襯衫！
HipHop板友至愛
香港已少咗好多人踩板，但小記知道唔少人心裏仲有團火！過氣板友注意，呢個系列可能觸痛你嘅回憶。I-Mego滑板系列相當識做，隨耳筒送隻手指滑板俾你過手癮，仲有埋轆同工具俾你改裝，唔止贈品咁簡單！
身為全場唯一入耳式耳筒，隔音效果做得特佳！又係Bass重傾向，壓迫感唔錯；行8mm全音單元，整體音準兼清晰到位。
