所謂人逢喜事精神爽，巴塞隆拿上周六擊敗維拉利爾，領先皇家馬德里8分，衞冕西甲冠軍十拿九穩；中場「小白」恩尼斯達周日又報喜，佢女朋友Anna剛誕下女兒，心水清嘅球迷都計到，B女係小白同佢女友世界盃後製造出嚟嘅愛情結晶品，擺明就係世界盃冠軍B女！
恩尼斯達周日係自己facebook同twitter，同粉絲公佈呢個喜訊，小白一向都好低調，所以只係好簡單咁講：「我們的女兒Valeria出生了，她與母親都一切安好，真的好完美。」超過一千粉絲為呢個西班牙同巴塞隆拿重心送上祝福。
西班牙出生率激增3成
由於西班牙係禁慾派，上年南非世界盃期間，一直都唔准太太同女友團入營，所以如無意外，為西班牙射入決賽「黃金入球」嘅小白，喺世界盃後同女友去地中海度假時製造Valeria出嚟，咁Valeria名副其實係西班牙嘅黃金B女。
其實上年暑假，西班牙為慶祝捧得國家首個世界盃，全國都歡天喜地，夫妻、情侶喺呢啲咁興奮嘅環境，自然更投入做床上運動，西班牙政府官員統計過，呢兩個月國內出生同即將出生BB，預計較上年同期多3成，擺明好多西班牙人都想生番個世盃BB；不過好彩小白有財又有勢，應該唔使好似香港父母咁，爭完分娩床位，又要排隊買奶粉。
碧基舉雙「V」冧女友
小白就弄瓦，師弟碧基就可能好快小登科；呢個巴塞中堅喺上周六嘅入球，就幫球隊攞晒3分。碧基入波後雙手擺出「V」字手勢慶祝，有人就以為佢為22號嘅隊友艾比度打氣，其實為自己溝女先真。事關碧基同佢女友Shakira都係2月2號出世，Shakira就77年出生，足足比碧基大10年；不過都無損呢對情侶發展。碧基咁高調向女友示愛，睇嚟打風都打唔甩。