男人三十而立，已成家立室的謝霆鋒生性做人，除了埋首密密拍戲銀外，原來8年前已開始秘撈，低調經營電影和廣告後期製作公司，生意越做越大，公司昨日宣佈擴充營業，霆鋒執到正向傳媒公告威水史，有傳公司年賺逾億，霆鋒只肯透露公司每年開支數千萬，他又自爆上周再簽下英皇的賣身契，為養妻活兒博到盡。
於96年只有16歲謝霆鋒挾星爸媽謝賢和狄波拉之勢殺入娛樂圈，苦幹15年終捱出頭，近日坊間盛傳他約滿英皇便自組經理人公司，然而事件峯迴路轉，霆鋒昨日現身銅鑼灣開平道出席旗下製作公司PostProductionOfficeLtd喬遷之喜，這間公司03年低調成立，足足在地下發展8年，霆鋒同時又直認上周與英皇再簽下賣身契。
保密身份實現夢想
一向不修邊幅的霆鋒，昨日難得西裝筆挺正式公佈自己的老闆身份，其父謝賢和英皇老闆楊受成相繼到賀。霆鋒表示製作公司另有一位拍檔，最初斥資7位數字，因為生意上了軌道，昨日搬遷之喜，公司分佈在5層商業大廈內，佔地合共13,000呎。
霆鋒說：「公司主要做電影同廣告後期製作，我低調唔講係唔想人哋因為我係謝霆鋒先畀我做，行內好多人知我係老細，楊千嬅同林海峰都嚟過錄音，投資係我嘅夢想，自己忍（口）得好辛苦。家公司成熟，紙包唔住火，晶哥（王晶）之前都爆咗出嚟，我又唔係唔見得人，好多國際品牌都係我哋客戶。」霆鋒透露參與製作的電影包括《全城熱戀熱辣辣》、《東風破》、《李小龍》等，而廣告作品則有綠箭香口膠、滙豐信用卡、SONY、FerreroRocher朱古力及謝安琪的豐澤廣告等。
計劃開班培訓後進
霆鋒表示當初拍完《玉蝴蝶》MV時，因要配合前後期效果，令他萌起成立本地製作公司的念頭，他不希望電影和廣告送到外國製作後期，他說：「我希望keep住香港嘅水平。」霆鋒續說：「公司最初只有11個員工，家增到成百人。」投資回本了嗎？霆鋒笑而不答，卻另晒業績說：「公司每年燈油火蠟同員工開支都要幾千萬，上海都開咗分公司，成績唔錯。」霆鋒還有意待公司周日休息開班提攜有意入行的年輕人，提供地方和器材培訓後進，並有意跟政府合作。
在公司負責巿場和管理的霆鋒，原來無意自組經理人公司，他說：「唔敢講一定冇，暫時99％沒興趣，我淨係管公司啲人，做經理人要同人嗌交，我唔鍾意同人嗌交。」
再簽賣身契免揣測
上周與英皇動筆續約，霆鋒保密年期，他說：「以我年齡，話長唔長，話短唔短，唔係雙位數，公司畀我好大自由度，只有我搵到人，冇人搵到我。」據知，霆鋒這次賣身契年期超過5年。
霆鋒英皇經理人霍汶希（Mani）昨日未見到賀，她昨日在電話中說：「霆鋒今日係拜神切燒豬，我祝佢公司越做越大，可以成功做好自己理想。」
談到霆鋒續約，Mani說：「霆鋒今年未滿，佢見外間好多傳聞，為免揣測咪早啲再續，年期就真係唔方便講，總之我哋畀到好滿意嘅條件佢，始終由佢16歲湊到家，大家一早有共識，唔使再重新了解同遷就，好清楚對方嘅需要。」Mani指如果霆鋒時間許可，今年有意為他推出國語唱片。
採訪：胡比、比華利
攝影：陳順禎
