【第30屆金像獎之男配角、新演員篇】自言拍戲一定要做男主角的泰迪羅賓，多年沒拍戲，去年一出山便成為今年電影評論學會的最佳男演員。回想對上一次攞最佳男配角後衰足5年，沒有戲拍，他自言不怕宿命只想再接再厲，慶幸自己並非靠電影搵飯吃，大把本錢贏獎輸錢。今屆金像獎，泰迪羅賓降格競逐最佳男配角，呼聲高唱入雲，「一鳥在手，勝過眾鳥在林」，不用跟後生仔如謝霆鋒爭男主角獎。
同樣是音樂人出身的陳奐仁在新人獎界別，力敵好打得的杜宇航，一個靠把聲，一個靠對手，結果真是要打過至知。
撰文：張俊銘、比華利、溫敏芝
泰迪羅賓要獎唔要錢 提名電影：《打擂台》
現年66歲的泰迪羅賓（TeddyRobin）是60年代香港頂尖樂隊歌手，在電影圈產量不多，處男作就當《愛情的代價》主角，電影於69年上映。起步早，數十年間Teddy的產量卻僅十多部，貴精不貴多，他去年憑電影《打擂台》中昏迷30年的武館掌門人一角，獲香港電影評論學會選為最佳男演員，但在今屆金像獎，他要降格競逐最佳男配角，贏面甚高。
攞配角獎衰足5年
Teddy笑說：「我知道自己喺戲中嘅角色好搶鏡，初時都以為自己會提名男主角，我話明係主角先拍，但可能角色唔係由頭帶到尾，變咗配角。點都好，會尊重公司決定，阿Q啲諗可能男主角攞獎機會仲少。」
Teddy根本就是音樂人，諷刺是未攞過任何音樂獎座，電影獎座反而有兩個，他說：「其實音樂上我從未攞過獎，都覺得有啲遺憾。」反而95年他憑自導自演的《香江花月夜》，成為珠海電影節最佳男配角，但得獎後卻像交了厄運，應了黃秋生話攞獎沒戲拍的口卦，Teddy說：「秋生講過得獎後就冇人搵，佢冇講錯呀，我之後5年冇拍過戲，當中唔係冇人搵，就係部戲唔啱，推推吓就冇咗下文。」
今次再問鼎獎項的Teddy自信冇有怕，因為不是靠拍戲開飯，獎還是想攞，他說：「演戲我要做男主角，一係我好鍾意個劇本。戲唔拍唔緊要，我有第二樣工作能力，可以做電影音樂搵到食。自細有自卑感，所以要搵到啱自己嘅嘢先敢做。」
Teddy坦言推了《打擂台》的角色兩次，他解釋初時的劇本戲份不多，又擔心演得不似，因為要扮演武功了得的梁小龍的師傅，戲中的陳觀泰現實中更是自己拳館的師兄，他說：「要我做佢哋嘅師傅邊得，最後我要用音樂大師嘅身份去代入，心態上先可以勝任，唔係邊夠佢哋打。」
口沒遮攔贏得角色
得到今次的好角色，Teddy指這是因果，全因他認識了兩位當年導演會的學生郭子健和鄭思傑，因為他們喜歡音樂，經常到他公司蒲，為他度橋、寫劇本和拍MV，Teddy說：「我係個口沒遮攔嘅人，可能因為咁，就搵我演呢個角色。」Teddy今後的打算是戲還是要演，但電影導演和監製還是會做，自問已經60多歲，難得是有着《打擂台》所倡導的鬥心，他說：「我覺得我得，所以決心去做，家籌備緊一部做電影監製，有一個劇本傾緊，唔想拍大製作，因為太多限制。」
最佳男配角提名
泰迪羅賓《打擂台》
梁家輝《狄仁傑之通天帝國》
鄧超《狄仁傑之通天帝國》
王學圻《劍雨》
廖啟智《綫人》
陳奐仁感激梁家輝 提名電影《李小龍》
現年35歲的新加坡音樂人陳奐仁，去年拍了一套電影《李小龍》，其肥頭耷耳cute爆形象，為他換來本屆金像獎最佳新演員提名。日前陳奐仁在中環的錄音室接受訪問，回想知道入圍後的心情時說：「好開心，因為真係冇可能，點解會輪到我。」扮演李小龍父親的梁家輝獲最佳男主角提名，陳奐仁表示衷心希望他獲獎，因為家輝是自己的伯樂，他說：「文雋同導演葉偉民話係家輝哥主動同佢哋講搵我試吓，於是我就好幸運有咗呢個機會。」
小動作凸顯自卑
為了演好李小龍兒時好友胡奀，陳奐仁為角色添加元素，他說：「奀仔屋企好窮，全靠阿媽幫李家打工，母子先可以得到照顧，所以奀仔性格好自卑，但對李小龍就好忠心。我仲幫呢個角色設計咗啲動作，為咗表現佢自卑性格，我配合做咗啲成日頭嘅小動作。」
不過作為音樂人，陳奐仁起先對拍電影有一定抗拒，他說：「我係音樂人，從來冇諗過拍戲，拍落發覺可以為李小龍做到啲嘢好有意義，同埋拍電影咁好玩同有趣。」對於本屆對手，他看好憑《葉問前傳》和《葉問2》兩部電影入圍新人的杜宇航，他說：「我睇好佢有兩部戲，尤其《葉問前傳》擔正扮葉問，佢掌握到角色，如果我攞獎就真係爆大冷。」
杜宇航傷面換提名 提名電影：《葉問2》、《葉問前傳》
現年30歲的杜宇航從6歲開始習武，學了詠春8年，拍下處男電影《葉問2》後，再接拍《葉問前傳》，結果兩片同時令他提名金像獎最佳新演員。
杜宇航表示對入圍感驚訝，他說：「兩部戲一齊入圍真係冇諗過，呢兩部戲角色好唔同，《葉問2》係反派，《葉問前傳》係正派，我係半途出家，有咁好成績好開心，如果兩部戲畀我揀，我對《葉問前傳》比較有信心，因為係擔正，有好多機會發揮。」他坦言有看其他入圍者的電影，比較看好彭冠期，因為他在戲中有大膽演繹。
有否信心獲獎？杜宇航說：「金像獎得唔得係睇投票，但得與失唔係最重要，有提名已經有交代。」
「成塊肉刮起咗」
杜宇航坦言當初接演《葉問前傳》做主角，壓力很大，因為甄子丹和梁朝偉也演這角色，難免被比較，故拍攝前他做了連串詠春訓練：「印象最深係唔小心俾彪哥（元彪）一拳打落塊面度，成塊肉刮起咗，有半塊指甲咁大。」
最佳新演員提名
井柏然《全城熱戀熱辣辣》
彭冠期《安非他命》（左圖）
陳奐仁《李小龍》
杜宇航《葉問2》
杜宇航《葉問前傳》
