西方電影有個得意之處，就係鍾意攞返幾十年前嘅電影出續集，唔止講緊《華爾街》，仲有睇到一班男觀眾勁熱血嘅《創戰紀》。前作《電子世界爭霸戰》破格在佢係史上首套用電腦動畫拍攝嘅電影，新作《創戰紀》亦食正現今最Hit嘅3D電影嗰條水。型到爆嘅光束賽車，3D效果好似凸咗出嚟咁正！
記者：王震遠
《創》Blu-ray屬2D、3D合版！28年前《電子世界爭霸戰》，講主角奇雲創作咗個程式，拯救虛擬同現實世界；今集就轉由佢個仔森姆擔正，並誤打誤撞下進入咗虛擬世界──網線，發現老竇奇雲原來被困網內！最後父子兵上陣，對付虛擬世界惡魔，並阻止入侵現實世界！
片車光尾 有質感
首數煲碟場口一定係片車嗰幕，平時最多見到尾燈，《創》索性將佢變成光束尾痕，由強光位到弱光位，簡直有如水彩漸層質感！而且更過癮係佢加入景深效果，由於畫面空曠又有速度感，後面有一大班觀眾，凸出感更強烈。
光暗高對比 無失真
唔少人幻想網絡世界，一定係白 、懶Cyber！《創》偏偏相反，成套戲黑沉沉，用光線嚟堆砌數碼感。自主角進入虛擬世界，基本光線都集中喺戲服同背景，如細心留意，會發現光位唔會太爆，機靚更能睇到螢光色漸層變化。
至於人物面相，基本長期處於微微Under狀況，想知你部機暗位表現如何？就要睇吓演員面相有無戲喇！而且真人版嘅戲，唔同電腦動畫CG！望落去立體感會自然啲，無電腦做得咁死板！
優先睇反斗車王2
《創》Making勁多幕後花絮，連美指都走出嚟，話你知件型爆發光戰衣嘅製作過程。另外還特別收錄咗動畫版《TRON：UPRISING》，同即將上映嘅《反斗車王2》短片，一隻碟有咁多嘢送，乜都返晒本！
Profile
片名：《創戰紀》
語言：Blu-ray英語（DTS-HDMA7.1）DVD英語（DD5.1）
特別收錄：揭開費林生活、戰記預備、音樂影片、虛擬「創世界」、角色安排
