中超上周末開鑼，升班馬廣州恆大豪花5,000萬人仔搞個開幕禮，又燒煙花又有古巨基、容祖兒唱歌助興，不過歸根究柢，都要足球比賽好睇，先至可以令中國足球翻生。打埋周日兩場波，首輪8場中超全部完成，廣州恆大號稱億萬兵團，結果主場都係由外援施奧（中）入波，1:0小勝大連實德，唔知擁躉會唔會失望，不過恆大班球員先袋走500萬人仔贏波獎金。首周最精采就係山東魯能對成都謝菲聯，國足中鋒韓鵬57秒就先開紀錄，不過成都三度落後追平3:3，如果場場中超都有鬥志咁好睇，就唔會搞到杭州綠城主場贏南昌衡源2:0場波，不足3,000人入場咁淒凉。