英皇書院校友反撲孫明揚嘅強制減班令，踏出成功第一步。英皇校管會下周一兒童節開會，校友校董要求表決推翻減班令，同埋是否就校董冇權投票進行司法覆核。
呢個會係英皇校友校董引用章程要求召開，教育局冇符。喺反對減班校董佔過半數下，兩項議案邊條獲得通過，教育局都係輸，所以本身係教育局高官嘅校管會主席譚貫枝事先話，佢哋休想提出。英皇同學會會長林超英噚日話，校友代表會聯同其他校董據理力爭，唔會再畀教育局亂嚟。
校友校董之一嘅鄭文容醫生就話，佢哋有兩手準備，「我哋苦口婆心，呢次係畀最後機會佢哋；主席失職要落台，唔好再阻住，佢老細真係冥頑不靈」。
英皇同學會明顯已搵咗法律顧問幫手，睇嚟件事上到法庭嘅機會好大。