食物及衞生局局長周一嶽呢排紅色火災警報，淨係公立醫院嘅火頭都一個連一個。一向有嗰句講嗰句嘅周局長，之前話醫生爭取合理工時係斤斤計較，令到班醫生怒火中燒，爭取醫生合理工時行動組今日會喺各間公立醫院貼海報寸爆佢。其中一款海報最諷刺，係周一嶽俾人影到喺立法會開會時候，攰到差啲瞓着覺。
爭取醫生合理工時行動組發言人袁孟豪話，醫管局淨係畀佢哋貼海報貼一星期，不過唔緊要，淨係屯門醫院都會貼100張，病人一定會睇到。行動組今個月中仲會喺全港18區超過100個街板上貼埋海報，爭取合理工時，醫管局同周一嶽嘅壓力指數，一個字：爆！