出名多料爆嘅公民黨大狀湯家驊，噚日突然透過facebook爆料，指根據兩個不同但可靠嘅消息來源，煲呔前日曾經秘訪社民連總部同一班80後對話，並與長毛達成初步共識，以財爺下台為條件，換取長毛喺議會餘下任期遵守行為。湯大狀上載有關資料冇耐，即時喺政壇同傳媒界激起軒然大波，除有電視台即時搵佢做訪問，又有一大班電子傳媒搵湯大狀查詢。
湯大狀對外界反應咁大表示震驚，驚訝原來咁多香港人缺乏幽默感，皆因噚日喺fb言論，全屬佢為響應愚人節而老作。其實湯大狀唔係首次咁搞鬼，上年就喺fb寫過自己決定退出公民黨加入社民連，你都咪話唔震撼。