【第30屆金像獎之女配角篇】今屆香港電影金像獎最佳女配角五位候選人當中，有四位年過半百，絕對沒有半點不敬，只相信薑是老的辣，據非正式統計，今屆女配角候選人的年齡總和，相信是歷屆之冠。今趟四位受訪候選人，包括一向儀態萬千、51歲的余安安，反過來演失心瘋的黑社會教母，粗口爛舌煙不離手；擅演端莊賢淑的鮑起靜，也反常濃妝艷抹，最幸運的反而是邵音音，在一套不太正常的電影中，以最正常的方法演繹；還有素顏上陣演獨身婦的朱咪咪。她們異口同聲表示提名已經是最大獎勵，但在女性內心深處，又豈會不期待本月17日金像獎頒獎禮的來臨？
撰文：溫敏芝、張俊銘、比華利
最佳女配角提名
余安安《飛砂風中轉》
邵音音《打擂台》
朱咪咪《月滿軒尼詩》
鮑起靜《月滿軒尼詩》
張靜初《全城戒備》（左圖）
余安安：當男人咁演 提名電影：《飛砂風中轉》
現年51歲的余安安，03年復出影壇，先後拍了《早熟》、《寶貝計劃》及《我要成名》等電影，今次憑《飛砂風中轉》問鼎最佳女配角。一向陰聲細氣的她在片中搖身變成黑幫阿姐啤梨姐，更要演鄭伊健的母親，但兩人年齡只差8年。日前余安安在金鐘接受訪問時，坦言接拍前從沒有心理關口要過。
「唔應該顧形象」
余安安說：「雖然未試過有咁大個仔，但導演心理上都有安撫過我，話可以講我好細個就出嚟，跟住生咗個仔，第二係個角色幾粗魯，但演員唔應該顧形象，應該演繹到人哋都相信就係成功，係好有挑戰性。」
從影多年，余安安坦言未演過這類角色，能夠提名金像獎最佳女配角，她說：「唔可以話有幾大信心，始終有五個人入圍，五個都好有份量，信心係有嘅，但都要睇評審鍾唔鍾意，部戲上映嗰陣唔係好高票房，唔知評審有冇睇，但我好鍾意個角色。」作為女演員，余安安知道有這個發揮是很難得，事前也做了很多功課，她說：「導演畀咗一個好好嘅指引我，當係一個男人去演就得。」
《飛》片上映後，余安安坦言有些朋友也說感覺怪怪，接受不到她這樣粗魯，但也有人稱讚她，她也吐出心底話：「有獎梗係開心嘅，話唔想都係呃你，但得唔得到，我只會抱平常心。」
朱咪咪：唔恨就呃你 提名電影：《月滿軒尼詩》
朱咪咪和鮑起靜在電影《月滿軒尼詩》中扮兩姊妹，這對姊妹花雙雙獲提名最佳女配角，首次獲提名的朱咪咪直認恨攞獎，但她也明白要配合天時地利人和，不能強求，所以她會抱平常心出席頒獎禮。
朱咪咪說：「我從來冇攞過，講唔恨就呃你嘅，但呢啲嘢恨唔嚟，攞到固然好，攞唔到都唔可以勉強。」環顧鮑起靜、余安安、邵音音和張靜初四位對手，朱咪咪說：「對手個個都咁強，邊個攞我都戥佢開心。」
難忘餵惡蚊
談到拍《月》片趣事，朱咪咪難忘「捐血」事件，她說：「有一幕講我哋全家人去拜山，點知墳場鬼咁多蚊，我咁好肉地，理所當然係做咗惡蚊大餐，結果好陰功，蚊怕水都冇效，我被咬到周身紅腫，又痕又痛，成個禮拜先散。」貪靚的朱咪咪表示戲中要素顏上陣扮獨身婦，她說：「唔化妝出鏡有啲唔慣。」幸好拍出來效果自然，令她很滿意。
鮑起靜：敬老氣氛濃 提名電影：《月滿軒尼詩》
61歲的鮑起靜出身演藝世家，前年憑電影《天水圍的日與夜》成為金像影后，榮耀為她帶來不少片約。在岸西執導的《月滿軒尼詩》中，她再次挑戰自己，演濃妝艷抹、風騷入骨的角色，贏得最佳女配角獎提名。
鮑姐早前接受訪問時說：「我以前真係好少演呢類角色，電影好似未試過㖭，好濃妝，每場戲都要塗指甲油，我都有問導演係咪將我同朱咪咪調轉咗個角色，反而咪咪今次個角色好溫柔。」
被打屁股難為情
鮑姐在戲內與李修賢那段感情戲，令這位影后也覺難為情，她笑說：「好似佢會打我屁股，我又會呷佢醋，有時又會無理取鬧，不過我演得幾開心，冇壓力嘅。」對於獎項，她認真地說：「信心唔會大，曾經攞過獎唔會咁易再有，機會率會少啲。」在眾多對手中，她看好安安跟咪咪，她說：「我諗都係朱咪咪同余安安之爭，朱咪咪演溫柔嘅角色恰到好處，安安又係我好朋友，佢本身係個好高貴嘅女士，要佢演個要講粗口嘅大家姐，真係唔易。」唯一不明白的反而是原應爭女主角獎的張靜初，卻角逐女配角獎。鮑姐大讚她是個很實淨的演員，她笑說：「我成日睇佢嘅戲，演得好好，不過只係家敬老氣氛好濃厚。」
談到另一位對手的邵音音，鮑姐覺得她很值得提名，她說：「音音姐係好好心地嘅人，好多人有錢都未必咁做，佢為同業做咗好多事。」鮑姐的老公方平也是電影人，在圈中甚有拉票能力，鮑姐笑說：「今次好難拉票，而且佢個個都想投，所以唔使佢操心喇。」
邵音音：梗想攞多次 提名電影：《打擂台》
60歲的邵音音年輕時曾任職護士，自72年加入影圈後，參演超過100部電影，08年憑《野．良犬》奪得金像獎最佳女配角，今年憑演出《打擂台》再度角逐最佳女配角獎，但今次的對手都是經驗豐富的老戲骨，令她未敢自視過高。
雖然如此，邵音音接受訪問期間也難掩興奮，她說：「上一次已經以為係自己嘅極限、高峯，估唔到今次可以再接再厲。第一次提名開心到日日笑，但冇諗到攞獎，得獎時仲唔識反應，第一次心情係激動，今次係驚喜。」
拍得辛苦想辭演
邵音音笑言今屆應該是有金像獎以來，候選人年齡總和最高的一屆，她對於強敵逐一分析，她說：「鮑起靜不嬲都好溫情，好似同你講緊嘢，將你融入角色；朱咪咪做戲好自然；安安十幾歲已經做戲，直情唔覺佢做緊戲，今次角色好突破，好成功嘅大家姐；張靜初好紮實。鹿死誰手睇評審，我梗係想攞多次。」
談到自己的演出，邵音音說：「其實唔係太滿意，因為導演要我做一個浙江口音嘅女子，窮得嚟要斯文，又要引觀眾笑，我本身唔斯文，加埋用特定口音講對白，對我嚟講好難。」拍《打》片時正值炎夏，在30多度高溫的鐵皮屋內拍攝，邵音音穿上旗袍也弄得濕透，拍至尾段更颳8號風球雷電交加，邵音音說：「可以想像一間冇人住嘅爛屋附近，情況係幾污糟，我每日忍十幾個鐘唔去廁所，唔夠膽飲水，困喺間鐵皮屋度，我曾經同導演講，不如換走我，但係兩個導演都唔睬我，最終好彩佢哋冇理我，哈哈！」
