陸續收到唔少遊戲要延遲推出嘅消息，不過呢隻日式鬥格遊戲《BlazBlue：ContinuumShiftII》（蒼翼默示錄：連續變幻2），排除萬難，仍然可於原定日期推出；除咗有18名角色登場外，仲可以用埋故事模式嘅終極Boss——μ-No.12-，一嘗做大Boss滋味！
記者：許福合
18名角色登場
今集《BlazBlue》其實係以街機版，加上原創故事模式而成，數數手指已係同系列嘅第三作，並且會有PSP及3DS版。
同街機版一樣，遊戲主要玩法以格鬥為主，所以登場角色特別受機迷留意，暫時公佈嘅登場角色一共有18名，包括有松鼠娘七夜誠、狼人管家瓦肯海因．R．赫辛等新角色；不過比較特別係，原本只有在故事模式中，打到最尾才出現嘅終極大Bossμ-No.12-，竟然可以供機迷選用，不過出招技能表亦比其他角色複雜，想當大Boss都唔易o架！
新手模式
作為街機熱門格鬥遊戲，唔少機迷都熟悉操作，不過，對新手嚟講，格鬥遊戲最難係操控，所以今集會有兩種操作模式可以選擇，分別為「新手」同「技巧」。
新手模式操作會簡化不少，原本要Chok招嘅特殊招式，可以簡化到幾個掣就出到，難度大減。喜歡玩故事的玩家會特別滿意，今集故事模式可以玩到30小時以上，但遊戲中字體好小，想從文字了解故事模式都幾考眼力！
999深淵模式
除了原有的「軍團模式」與「畫廊模式」外，新加入一個「深淵模式」。這個玩法特別刺激，當機迷選定一個角色，系統會作出能力強化，開始不停的生死格鬥，最難係即使勝出，生命值都只會作小量回復，隨即就要接受下個對手挑戰，而敗了自然係GameOver啦！
呢個層級遞進式戰鬥，官網透露深度達999層，筆者就好懷疑有無人可以打完！雖然難度咁高，不過當打到特定層數時，可能會有Boss級角色出現，打贏佢哋有機會獲得特別道具喎！
Profile
主機：PSP/3DS
遊戲類型：動作
遊戲人數：1-4人
製作廠商：ArcSystemWorks
網站： http://blazblue.jp/cs2_m/index.html