飲食界立法會議員張宇人同一班議員，噚日拉大隊去灣仔大亞味工房日本料理，以示為飽受日本大地震影響嘅日本食肆打氣。老闆許先生話，現在正值日本國難，所以唔請議員食貴嘢，只係招呼佢哋食一般料理。
鮮帶子快斷市
民建聯黃定光把口唔收，邊食邊大嗌「呢間大亞，有核子味呀！」呢個爛gag全場冇人笑得出。許老闆其後向傳媒吐苦水，指地震後生意驟跌三成，又指有日式食肆澄清唔係用日本食材，試圖挽回消費者信心，明顯係自亂陣腳。
窮人盲搶鹽，富人呢期就興搶鮑魚、帶子。大亞有做批發，許老闆透露早排有稀客揸Benz駕臨，一擲9萬元狂掃日本鮑魚、帶子同清酒，話擔心日後日本貨有輻射喎。許老闆又指由於宮城、岩手海產養殖場被大地震破壞，現時香港賣嘅日本鮮帶子、磯煮鮑魚相信好快冇貨斷市，之後隨時要等10年先再食到，因此最近有唔少人搶購，「有人一買買10斤，有人一次買四箱，擔心家唔食，可能終身遺憾」。許老闆稱雖然來貨少，但只係按通脹酌量加價半成。