全城唱好曼聯同老費！話說英超同聯賽領隊協會（LeagueManagersAssociation）嘅贊助商巴克萊，早前做咗一系列統計，當中包括預測今季英超錦標誰屬，竟有8成嘅受訪領隊都相信費格遜可以帶領紅魔重奪英超冠軍，兼打破紀錄成為首支19次問鼎英格蘭頂級聯賽嘅球隊，傲視英超！
8成領隊睇好紅魔奪冠
英超進入倒數階段，榜首嘅曼聯家雖然只係領先打少1場嘅「2哥」阿仙奴5分，如果我求大俠家話紅魔攞硬英超冠軍，肯定會俾其他隊嘅擁躉話我偏袒紅魔；但根據巴克萊嘅統計，原來8成嘅領隊嘅心目中，都係唱好曼聯可以「爆廠」，重奪失落咗一屆嘅錦標，當中只有7%撐兵工廠可以後上摘冠。至於同樣打少場、落後曼聯9分嘅車路士，都有7%受訪領隊相信佢哋可以成功衞冕。
事實上，紅魔餘下8場英超賽事，包括周六早場作客韋斯咸，贏波自係冇難度。關鍵大戰在於下月初要先作客阿仙奴，再返主場迎戰車路士，但若然呢兩場關鍵戰唔使輸，餘下嘅對手只剩番布力般同黑池，都好難阻止紅魔登上頂峯；難怪領隊們都一致睇好被選為英超史上最佳領隊嘅費格遜，可以帶領曼聯超越宿敵利物浦，19次問鼎英格蘭頂級聯賽冠軍！
安達臣被嘲似Simpson
不過，嗰邊廂曼聯畀人唱好，呢邊廂紅魔自己就搞咗個「公投」唱衰自己友。話說曼聯搞咗個「奧脫福最差衣着大獎」選舉，過往都係由加利尼維利大熱當選，但佢老人家今季退休，造就拿尼同路爾斯安達臣雙雙成為奪標大熱。投安達臣一票嘅布朗話佢成日踢拖，朗尼就加把嘴笑佢着咗《阿森一族》「爹哋」河馬對人字拖。至於撐拿尼「奪冠」嘅主因，佢嘅中場拍檔卡域克就話︰「曾經見過佢着一件黃、藍色雙面tracksuit，再襯對撞晒色嘅鞋，簡直係我見過最核突嘅打扮。」睇嚟，拿尼現效皇馬嘅前曼聯老友基斯坦奴朗拿度，冇留番啲着衫貼士畀佢喎！