踏入4月，大家變得緊張兮兮！有人等緊會加幾多人工，有人等緊幾時派6,000銀，有人為快有起碼時薪28蚊雀躍不已。歐洲足球場上，開始進入衝刺期，各地賽事今屆也顯得極緊湊，隊波還有得爭還有得頂，擁躉也特別興奮；像利物浦，季初失地太多，但新帥領新軍越打越似樣，過到熱刺或曼城踢到歐洲賽，不出奇！今次作客少讓西布朗平/半高水，鬼盤？班波同車仔一齊重踏正軌，不用心多，有得分，上盤較車仔值博，選作今周重心。
上輪大膽在本欄指莊家開杜根咸讓錫周三冇眼光，開錯盤，結果錫周三早段領先，完場前被逼和下盤食半格，遺憾冷至2.85倍客W失手，證班波同小弟霉氣3月不散；還好4月新開始，選擇多更不用再愁周周貼英甲無人賞識。
不過，香港好多賭友習慣周六晚上黃金時間玩英超賭歐洲波，上周六無英超，國際賽未夠鐘開波，大家傾注買杜拜世界盃賽馬日，幾隻香港馬有份參賽已令大家如癡如醉，6場馬埋單投注額破紀錄過億；難怪正牌莊家不知幾喜歡開海外賽，尤如開盤玩外國足球，開賭成本遠比本地賽馬輕，日本地震、南韓多蠱惑波暫不再開盤，加上澳洲波收「咧」，真空的香港假日下午心癮難頂，還好夏令時間已臨，黃昏有得睇有得玩。
重心捧利記，各英超強隊今周作客波，以紅軍單W最好分；兩超貴箭頭1月加盟，蘇亞雷斯上力加上冇踢國際賽唞夠，安祖卡路爾周中踢英軍入波，信心回來，這對新組合開始上力就不得了。最令筆者佩服是古積特，樸實無華默默幹，不怨天尤人，年屆30，無論踢國際賽或球會，都瞓晒身不斤斤計較，抵紅軍送上豐厚續約條件，過30歲無用，看來只適合雲格治軍理念；對手西布朗由前領隊鶴臣領軍，大打穩陣波已5戰不敗，但上場逼和阿仙奴靠對手後防發夢，加上這支聯合國部隊自國際賽後有走樣危機，冇贏紅軍本錢。
今期貼士提供多了，讓波友可依信心度作「靈活玩」；車仔勝在人強，會是紅魔末段爭標大患，但作客到間有佳作的史篤城單W嫌熱，不如冷博韋根。對手熱刺夢在歐聯鬥皇馬，防線傷兵又多失準絕不出奇；英冠博侯城卡城，為爭升班，主場讓得起；荷甲守尾門，不放棄飛燕諾，平手迎阿爾克馬爾，坐和望贏；阿仙奴只剩聯賽，大部份擁躉不會太緊張，有法比仔復出，博大炒波膽博懵算了。
文：蘋果波神
貼士
讓球：利物浦（上）/侯城（上）/飛燕諾（平）
主客和：侯城勝（2.15）/韋根勝（3.05）/車路士勝（1.58）
波膽：阿仙奴勝4:1（14）、5:1（25）/卡迪夫城勝2:0（7）、3:1（13）
（左起為最有信心之選）