唔覺意踢爆08年香港喺奧運馬術比賽前後受恐襲威脅嘅入境處前處長白韞六，受呢件事影響，原本作風已經好低調嘅佢近乎隱形，就算上月28日退休，都冇好似前幾任入境處一哥咁接受訪問，暢談退休感受，只係喺退休前接受政府新聞網訪問。
白Sir喺訪問中主動講佢78年剛剛離開入境處學堂後，被派到羅湖關卡工作，佢話當年農曆新年羅湖晨早4時就要開關，白Sir同其他同事要半夜兩、三點起身準備工作，由朝早做到深夜，根本趕唔切返屋企瞓，惟有喺羅湖關卡辦事處會議室瞓睡袋。佢話後生時捱吓苦無所謂，以後遇到困難時就唔使怕。白Sir另一難忘事係負責灣仔入境大樓工程計劃，當年要巡地盤，逐層樓檢查啲地線鋪成點，佢話估唔到做入境處連地盤工都要做埋。