張以筠與拍檔在中環開設本港首間自助畫室，由蝕本到回本、開分店，足足用了10年時間才站穩陣腳。放下高薪厚職，她說「梗係賺唔返，不過呢啲開心用錢都買唔到。」
記者：陳皓怡 攝影：梁鑑章
張以筠開自助畫室，原因是十年前任則師時，工作壓力大得瀕臨爆煲，「同啲發展商嘅項目經理開會，係一場角力，佢哋諗點樣賺多啲、平啲、快啲、起多啲樓，諗到啲乜都壓落嚟。」
早年在上環租了個200方呎單位，方便舉行工作坊及展覽，有次與朋友在該處畫畫，「畫畫吓覺得開心咗，將平日啲負能量釋放咗出嚟。」減壓繪畫活動演變成一盤生意。
幸業主並未狂加租金
為爭取「曝光」，雖然租貴，她仍選擇地舖，並選址中環，但揀選乏人問津的戰前樓宇。「呢度高樓底好正，不過嗰陣都幾殘，要大執，我呢個則師已經好慳，都要50萬。」開業60餘萬元（表1）資金部份靠銀行貸款。幸好業主加租沒開天索價，令畫室在威靈頓街屹立逾10年。
「嗰時自助畫室冇乜人識，好多朋友畀意見我哋，話唔好只靠畫室，所以第一個名叫MeliMeloLivingArtsCafe。不過，去到底無論搞乜節目，都係畫室最出色。」捱過兩年終回本，其後主攻畫室業務，生意開始有增長，第三年張以筠才敢支薪。
拓自家品牌開源節流
談興趣、講藝術，但說到做生意點都要賺錢，「我哋連洗筆都有研究，家一個人90分鐘就能夠洗1000支筆，多咗嘅時間就可以建立客源，提高質素。」畫室不用聘請導師，僅提供顏料、畫布、畫具，為減省成本增加收入，她開拓自家品牌，自行在海外訂購顏料，在港包裝零售，結果捱過金融海嘯，高峯期一個月有700個客，每年營業額達300萬元（表2），毛利達30%。
自助畫室普及，本地客由過去少於5%，增至現時50%，公司客現時佔總營業額三分一，「近排有個新加坡公司客喺我哋度搞活動後，介紹另一間上海公司嚟。」張以筠跟夥伴兩年前計劃開分店，除做中環高檔路線，亦希望走大眾化路線，「開分店想試新嘢，喺商場開，畫嘅係經濟嘅畫布，時間短啲，定價可以平啲。」
後來者未必捱到10年
「Art係咪咁得人驚？」張以筠開設自助畫室，希望反傳統，10年來她堅持不教畫畫，「好似我煮飯，手勢未到三星米芝蓮大廚咁勁，但係我唔會因為咁唔煮，我討厭啲人對Art好認真，諗埋一邊。」
近年自助畫室在香港冒起，這位香港「始祖」說：「市場個餅大咗，多啲人可以認識我哋，而且壟斷唔晒，有對手唔係唔好，可以爭取新生意。再者，佢哋未必捱到10年，要好似我哋咁有決心。」
更令她有信心是，早於01年，她已將「ArtJamming」在商標註冊處登記成為商標，避免自家品牌被抄襲。
早將商標註冊
張以筠指，雖然已註冊成商標，但要捍衞自己的權益仍需律師出手，「只要佢哋叫佢個活動、間嘢做ArtJamming就係犯法。冇一個國家有註冊商標嘅警察，但我哋可以搵律師，呢6個月我哋寫咗20幾封律師信。」