墨西哥人為咗玉米，印度人為咗洋葱，都曾因為加價而上街抗議，突尼斯去年十二月發生之示威，最初亦由食物漲價而起。全世界人民都為咗食物價格節節上升而不滿，但偏偏美國聯儲局就堅持核心通脹（二月份係0.2%）甚低，不足為患，要繼續維持貨幣寬鬆政策，所謂核心通脹就係排除食物及能源價格嘅，偏偏呢兩樣漲價得最快，你話普通人點能夠理解核心通脹吖，故此紐約聯邦儲備銀行行長落區解釋核心通脹，指出iPad價錢下跌時，一位市民大叫：「我地唔食iPad！」
最近美國德薩斯州有一位仁兄坐汽車到TacoBell買傳統墨西哥食品BeefyCrunchBurrito，買咗七件，付鈔時，發覺每件價錢由美元九毫九加至一個四毫九，增幅50.5%，為之大怒，拿出車內之來福槍，猛咁搖動，夥計大驚，立即報警，警察趕到，與怒漢對峙、互相射擊凡三小時，最後警察放射催淚彈先至將怒漢制服。
如果伯南克去買burrito，佢會唔會覺得食物價格無關重要，與佢嘅QE2政策無關呢？呢日沙田陳太去咗大埔街市買餸，話見到啲薑、菜、牛肉貴咗好多，買餸錢好快用晒。向佢講起德州怒漢買burrito之故事，沙田陳太面色一沉咁話：「我去到街市都想揸把刀呀？」左丁山嚇咗一驚，唔係咁激呀嗎？沙田陳太大笑：「我地邊有咁好膽吖，斬伯南克就話啫，做乜要斬信差（messenger）。」
佛利民話過，通脹到處，永遠都是貨幣現象（Inflationisalwaysandeverywhereamonetaryphenomenon），聯儲局反駁話，基本上聯儲局買入債券嘅錢，仍在銀行體系內之「超額儲備」（excessreserves）內，銀行冇用到，即係話聯儲局實際上冇增加太多貨幣供應。但假若銀行一旦將呢啲超額儲備借出去又如何？QE2政策大大提升咗全世界對寬鬆貨幣政策之預期，與通脹必升之理性預期，碰啱不同之天災令到一啲國家糧食失收，糧價唔升就難啦。