阿強向來不擅辭令，中學畢業後絕迹於運動場，自此變得氣虛血弱，說話細聲得隔籬位都聽不到，搭小巴嗌落車更是苦事一樁，常因司機聽不到而過站，要行一大段路。高絲經常諷刺阿強「毒毒哋」（網上稱呼內向男孩為「毒男」）。
「我只係細聲，唔代表我毒。」他抗議。「毒男係唔敢嗌落車，小巴到站仲要上高登問點算，兼等到總站才下車，才算是毒男，我唔係。」阿強重申，說罷怒氣冲冲離開。
不務正業「毒男」最難頂
第二日，阿強興高采烈的來跟高絲說：「太好了，有人整咗個app，當小巴就到站時，就可以開個app嘅掣，之後就可以用部手機出聲，自己唔使嗌出口，幾啱毒男用呀。」
「哈哈，乜有人唔係唔認係毒男咩，點解家陣又會用呢個app呀？」阿強沒有理會高絲，只自顧自的說：「呢個app有好多功能，唔單止幫你嗌落車，仲可以講明地點，例如街口、轉彎、橋底等等，仲有英文功能，外國人嚟到香港都可以用到，雖然我好少見遊客坐小巴，多數都係菲傭，可惜個app暫時只得Andriod，iPhone冇份，要出多部Andriod先用到。」
高絲覺得，其實男仔「毒」真係冇乜所謂，就算是最少同人接觸的IT男，當他們打多幾年工，慢慢就會改善社交障礙，只是時間問題，但最差的「毒男」便是不務正業、游手好閒，終日上網發洩不滿的人，在網上留言聲大夾惡，現實世界只懂一味依賴父母、親朋戚友同政府，不單金錢上要幫助，開口點菜同嗌落車都要其他人幫，呢啲「毒男」真係港女界頭號unfriend對象。
高絲兜咁大個圈，只想話科技係協助人生活，而不是代替人類生活，這個「毒男落車app」雖然可以幫到「毒男」行少次寃枉路，但就令毒男一世被標籤為毒男、毒中，永無翻身的一天，根本就係毒男的軟性毒品！
今日高絲只想向全港所有毒男講句：向毒男落車app說不！
高絲