民建聯主席譚耀宗出名EQ高百毒不侵，面對任何挑釁都可以一臉淡淡然，好少露出嬲怒相，點知鼠王芬喺議會內有創舉，成功令譚耀宗動真氣。
議事規則委員會日前閉門開會討論議員開會時掟嘢問題，主席譚耀宗總結時指議員對是否訂立懲罰機制無一致意見，因此指示秘書處再研究，認為應該對行為不檢議員扣人工嘅梁美芬卻繼續大發謬論。有與會者透露譚耀宗忍咗一次，叫鼠王芬提出具體建議而唔好齋噏，點知鼠王芬充耳不聞，據講譚耀宗當場發火拍枱，全場頓時鴉雀無聲，鼠王芬才收口。
八方問過譚耀宗，佢話邊度有拍枱吖，當時只係「講嘢大聲咗啲啫」。發哥喺《監獄風雲》教落：「我大聲講嘢唔代表我冇禮貌」；譚耀宗強調只係小事一樁，應該冇人會嬲咗佢啩。