聖誕節有聖誕老人，咁復活節有乜？咪係白兔叔叔。部署參選嘅田北辰，趁噚日愚人節，一早走入八鄉「名校」元岡幼稚園，同班細路提早慶祝兒童節兼復活節。田二少戴上助手預先為佢準備嘅白兔公仔頭套，化身白兔叔叔娛樂大家，班細路見到佢咁嘅打扮開心到震。田二少同佢哋喺環保袋上畫畫，又同佢哋影相，搞咗兩個鐘先走。
校長冇人工加
呢間元岡幼稚園，咪就係因為以月薪4,500蚊、請一腳踢校長而出名嗰間，好彩最終請到肯蝕底嘅呂麗紅校長主持大局。呂校長上任時，學生只得小貓幾隻，仲係南亞裔佔多；家去到28人，仲要開埋下晝班，大多數係本地學童，真係可喜可賀。呂校長雖然做出成績但冇人工加，而且照樣要落手清潔學校，但就多咗一位老師同兩位嬸嬸幫手，仲有善心人定期送生果畀佢哋享用。咁身為葉劉新民黨副主席嘅田二少有冇叫佢入黨？呂校長話冇喎，只係話學校有需要，可以搵佢幫手。