大哥鄧光榮大前日因心臟病發猝死家中，佢嘅家屬包括遺孀嚴小屏、大女鄧業炘同細女鄧業煒大受打擊，令唔少親友都為佢哋憂心。
大哥生前好友、資深電視人馮美基噚日去咗加多利山鄧家大宅，逗留約一個鐘離開，問鄧太心情好番啲未？馮美基話：「好啲，未完全平復，呢幾日朋友會不停探佢，睇有乜幫手，同佢傾吓偈，等佢冇咁唔開心。」
白雪仙同陳淑芬噚日亦先後去大哥屋企探望家屬，一身黑素服嘅仙姐喺朝早十一點半抵達，約個半鐘後離開，佢冇回答記者提問，只保持一貫嘅優雅微笑。
秦沛感慨
噚日下晝仲有唔少人同車喺鄧家出出入入，相信都係啲親友去開會共商大哥嘅喪禮，其間鄧家嘅司機同家傭拎咗大袋紙杯、衣紙同生果入屋，又有人送花，而鄧光榮細女就坐七人車去咗九龍城。
同大哥相識幾十年嘅秦沛，噚日喺機場提起故友，話覺得好心噏，佢話上個禮拜至同大哥及一班朋友打高球，當時大家仲回顧已經識咗幾十年，秦沛好感嘆咁話：「鄧光榮平時好健康，成日做運動，又有bodycheck，唔知點解會咁。」
另外，連日唔少圈中人包括蔡少芬、蔡卓妍、洪天明、吳家樂、孫耀威、伍詠薇、林建明、蔡一智同黎瑞恩等，都喺鄧光榮大女業炘嘅微博留言慰問。