「我成世人最怕俾人屈同呃！」任職夜更的士司機10年的吳宗錦，在別人眼中是死硬派，他深明當初只要肯「食死貓」認罪，便可為這宗案件畫上句號。「其實呢條罪（無禮貌及不守規矩）係好小事，就好似隨地吐痰或丟垃圾被票控咁平常」。然而他選擇爭取公義，終花掉5萬元律師費還自己一個清白。
官提醒認罪只罰800
吳宗錦表示，案件開審當日，法官開庭前稱認罪可減輕罰款，「佢話呢條罪只係罰款1,200蚊，認罪仲可以扣三分一減至800蚊，所以叫我諗清諗楚，押後45分鐘後再開庭」。不過他堅持不認罪，法官只好將案件排期審理。
由事發日08年11月19日，至去年9月案件審結，聆訊共花五天時間，案件困擾吳宗錦近兩年半。雖然法庭最終判他無罪，還他清白，但卻陪了夫人又折兵。「真係好無奈，認罪就800（元），唔認罪就5萬，話告我就告我，對職業司機好唔公平」。由於部份律師費是由行家籌募所得，吳宗錦決定抗爭到底。
「我估唔到今時今日香港會有啲咁嘅事，呢兩個警察好後生，就覺得自己高高在上，尤其姓李嗰位，我代表律師喺庭上叫佢警員時，佢好串咁話：『唔好叫我警員，我家係幫辦』！」
吳回想當日若肯「認低威」，就不會激怒警員，引發軒然大波。但他理直氣壯地說：「我冇做過，點解要認？」本報記者