【本報訊】本港發生飲用樽裝蒸餾水中毒奇案。一名24歲印傭上周六與僱主一家到迪士尼樂園遊玩，喝了一口新開瓶的430毫升維他蒸餾水後，即感到喉嚨焦灼，醫生診斷後發現其喉嚨及食道受傷，須留醫兩晚。事主昨日接獲衞生防護中心通知，樽裝水經化驗後證實含俗稱「哥士的」的氫氧化鈉，喝下隨時致命。警方昨晚經衞生署轉介已主動聯絡事主，事主質疑維他生產程序出現問題，希望警方查出真相。記者：盧文烈、張嘉雯
陳先生向本報投訴稱，其司機2月11日在馬鞍山蜆殼油站購入一箱24支、每支430毫升的維他蒸餾水，價錢30元，供家人外出時飲用。上周六（3月26日）陳生與妹妹Virginia兩家人到迪士尼樂園遊玩，帶了三支樽裝水同行。下午4時多一家人吃下午茶休息，陳先生的印傭Siti打開其中一支維他蒸餾水飲用，即時感到喉嚨焦灼。
Siti說：「覺得喉嚨好辣、好熱，即刻講唔到嘢，係咁嗌『呢支唔係水嚟嘅』，但講唔到出聲，佢哋畀我飲茶，我嘔出嚟，手好凍，覺得喉嚨好痛，水嗰啲味好似洗潔精咁，好濃。」
證實含氫氧化鈉 警跟進
Virginia憶述，當時Siti抱着頭，「咁啱我哋買咗三支烏龍茶，即刻畀佢冲吓，佢一飲就即刻嘔，飲兩啖嘔一嘔，一路嘔到上車都仲嘔，初初嘔啲水，後尾有血，成個人標晒冷汗，之後仲成個人軟晒，跌咗落地，喺度喊」。
他們即時聯絡迪士尼的急救隊，當值護士檢查後決定將Siti送到瑪嘉烈醫院，醫生診斷Siti的喉嚨和食道受傷，「佢話如果唔係即刻飲咗啲茶，可能會揦穿埋個胃」。醫院抽取水樣本化驗，院方表示時間太短，只驗到酸鹼度，指瓶內的是強鹼，「佢話係類似哥士的嗰啲，唔適合人飲用」。
陳家傍晚向醫院當值警員報案，但當時不獲受理，「佢（當值警員）話要我哋攞好晒證據先受理，即係要等個醫生報告出咗，再攞埋個化驗報告先可以報警，仲話就算我哋返馬鞍山報警結果都係一樣，但係我哋覺得事態嚴重，唔係人人都咁啱有幾支烏龍茶喺度畀佢冲，如果咁啱有小朋友飲咗又唔識講，就不堪設想，腸穿肚爛幾嚴重」。
事發翌日Virginia曾致電醫院管理局中毒諮詢中心，中心回覆指已得悉事件，正進行調查，Virginia說：「我哋擔心唔只一支有問題。」
陳先生妻子說，衞生防護中心昨日致電她，透露經化驗後證實該樽裝水含氫氧化鈉，傍晚時分，馬鞍山警署來電，表示經衞生署轉介會調查事件，晚上多名警員到其寓所錄取口供及取走該樽裝水。
維他奶：生產線無異樣
本報周二抽取問題蒸餾水樣本委託香港標準及檢定中心進行化驗，結果顯示樣本酸鹼值達13.5（鹼性最高為14），鹼性極高。
本報昨向衞生署查詢，發言人示意記者向醫管局查詢，未肯作出回應，但晚上突然發出新聞稿，指衞生防護中心正調查一宗由醫管局呈報的個案，涉及一名據報飲用樽裝水後感到不適的印尼裔女子。中心正聯同警方及食物環境衞生署進行調查，以確定事件起因。
維他奶國際集團表示，公司已檢測有關產品的存倉樣本及生產紀錄，顯示產品味道及顏色正常，當日生產線亦運作正常，並無異樣，公司深切關心該外傭的健康情況。蜆殼發言人則稱，公司旗下油站便利店的貨品均由信譽良好的供應商提供，客戶如對貨品有任何疑問，應向個別供應商查詢。
飲水灼傷喉示意圖
