香港啲名人公子愛與國寶交往，尤其係有跳水金牌嗰啲國寶級運動員，八方聽聞政務司司長唐公子亦唔輸蝕，今年5月可能有機會攬住國寶happy吓。
據知唐公子5月會到四川一趟，視察大地震災後重建工作，因為香港撥咗好大筆錢到四川支援重建，卧龍大熊貓保育基地係重點項目，因此唐公子稍後會代表港府到當地睇睇重建進度，確保香港人嘅錢唔會用來興建豆腐渣工程。
前政務司司長肥龍、「好打得」局長林鄭月娥同煲呔都試過攬大熊貓，今次終於輪到唐公子，競選特首比對手又多一項優勢。
議員詹培忠日前在飯局上預祝唐公子馬到功成，唐公子話「一年後係至係啦！」老詹話唔使等一年，噚日就已經可以叫唐公子做特首，因為煲呔放假，唐公子名正言順做署理特首。