【北京直擊】
人妻楊千嬅昨日在北京首次做客席模特兒，壓軸行騷。她早前在台灣接受訪問，自爆曾被舊愛的「小三」爆粗騷擾，事件令到她一眾前度情敵如蔡卓妍、徐濠縈成為嫌疑人物。千嬅昨日澄清小三不是圈中女星，自己婚後都不會防小三出現，笑言寧願防蟲。
楊千嬅昨日在北京時裝周，為美籍意大利設計師MarcCain的2011秋冬時裝騷，上天橋行騷。千嬅穿上全黑連身皮裙、踩着厚底高跟短靴壓軸出場，在台上除褸叉腰，笑容滿面，表現淡定。
「唔關藝人事」
千嬅謂一向自知身材矮細，所以平日有各類品牌活動，都很少上台行騷，前晚可算是第一次正式行天橋。千嬅早前在台灣接受訪問時，自爆曾經被舊男友的小三騷擾，惹來外界猜測誰是小三，圈中多位女星如徐濠縈、蔡卓妍（阿Sa）和譚凱琪等齊齊成為嫌疑人物。
對此千嬅昨日說：「我都唔知發生乜事，之前接受台灣同內地傳媒專訪，佢哋唔係好清楚我嘅前半生，所以我就講番過去嘅人生經驗，呢啲係細個時嘅經歷。真係有呢個人，但我唔想講幾時發生，費事越搞越亂，總之係絕對唔關藝人事，真係唔想騷擾人。」
兔年無暇造人
現在成為人妻，問到婚後有甚麼方法防小三？千嬅笑說：「冇乜要防，得閒防蟲好過，如果係個天賜畀你，你都冇得防啦。」她謂更傳了短訊給阿Sa和徐濠縈解釋。她之前透露預備造人大計，問她開工未？她說：「未呀，呢個月唔成功，本來之後打算休息，但跟住又要開戲，仲有4個巡迴要做，係我一廂情願想有得休息，有合約喺身冇辦法，我諗兔年應該都搞唔成，人都唔喺香港，惟有等天安排。」她謂老公丁子高沒埋怨，只擔心她身體。
採訪、攝影：SnowYip
