真係舊夢不須記!曾經喺地產市場叱咤一時,之後仲入主埋亞視,做過傳媒大亨嘅封小平(圖),幾年前將手上一批物業抵押畀中銀香港(2388),但係之後冇如期還錢,全部物業俾銀行充晒公,其中包括兩間喺山頂加列山道嘅陽光花園豪宅。
呢兩間貴價獨立屋,中銀啱啱委託仲量聯行以銀主盤形式標售,分別係E同F屋,面積2995平方呎,每間市值各1.5億,據聞已經有幾個本地同內地嘅富豪吼實,唔知有冇亞視新主王征呢?
陽光花園係封小平同生意拍檔莫維德喺96年發展自住嘅物業。家嘅名人業主,包括影帝周潤發(舊年用1.28億買入A屋),想同發哥做鄰居,不妨諗諗。