【本報訊】被譽為「學生王子」的粵語片紅星鄧光榮，昨日傍晚時分在加多利山寓所心臟病發逝世，終年64歲。鄧光榮長女鄧業炘宣佈其死訊時表示，父親「好自然好安詳離開」，並形容父親去世係「全世界遺憾」。記者：張俊銘、黃偉雄
人稱大哥的鄧光榮一向有高血壓，前晚他帶朋友往海王星賭船耍樂，至昨日中午落船返回加多利山寓所休息，豈料期間突然在家中梳化睡夢中心臟病發，其後其家中傭人發現後即時報警，但救護員到場後證實鄧光榮已經離世，死因沒可疑。
長女：佢好自然好安詳離開
鄧光榮長女鄧業炘昨晚10時許在鄧光榮寓所外跟傳媒宣佈父親死訊，姜大偉和無綫高層何麗全等陪伴在側。鄧光榮女兒說：「多謝大家關心，好不幸爸爸今晚離開我哋，佢好自然好安詳離開，呢個係所有屋企人同全世界遺憾，希望大家尊重爸爸最後一程，我明白大家要工作，希望以屋企人為先，令佢順利離開屋企，我哋屋企人好團結，會順利辦好佢身後事，所有嘢會用佢最鍾意方法去做。」黑箱車亦於差不多時間駛往鄧家接鄧光榮遺體離開。
鄧生前好友曾志偉昨晚接到鄧光榮的死訊，他表示十分愕然：「佢一向好健康，前幾日先見過佢，仲一齊打高爾夫球，我哋都係明星高爾夫球隊。」曾志偉表示仍未能與鄧光榮的家人取得聯絡，所以未知家人對後事處理的意願，有需要會協助處理。
鄧光榮另一好友林建明亦證實鄧光榮死訊，她表示曾致電鄧光榮身邊人，沙姐昨日更在電話中激動落淚說：「我打畀佢身邊朋友，個個都喊得好犀利、好難過，講唔到啲乜嘢，我都好難過，點解會咁o架？點得o架？佢點可以丟低佢老婆o架！」
50親友鄧家大宅送別遺體
昨晚10時40分左右已有10多名記者在鄧光榮位於加多利山嘉道理道寓所門外等候，其間只見十多名友人來到鄧宅，包括影星姜大偉和李琳琳夫婦及律師林炳昌。據知他們到鄧家的後花園聚集商討鄧光榮後事。鄧光榮原定昨晚出席扶輪社一個晚會，但最終無法成行。
鄧光榮遺體今日凌晨12時15分被黑箱車運送離開，連鄧光榮女兒、陳淑芬和姜大偉等近40、50名親友送行，其家人為不想被打擾，特以雨傘遮擋，而鄧光榮遺體被送離開寓所後，其親友亦離開鄧家大宅。
對於「銀色鼠隊」再損一員，成員之一的謝賢表示欷歔，他透露是由鄧光榮家人通知其死訊，他說：「呢個時間唔會去佢屋企，睇吓第時有乜要幫手囉。」粵語片時期跟鄧光榮合作無數的薛家燕昨日亦接獲好友離世，她昨日在電話中說：「好突然！好唔開心，佢仲咁後生！上星期我去食飯先至撞見佢，見佢仲好精神，點知今日話佢走咗！我都唔知講乜好。」鄧近年淡出娛樂圈，間中會出席慈善活動。昨晚7時許曾誤傳大哥成龍死訊，但原來是指大哥鄧光榮。
鄧光榮
年齡：64歲
籍貫：廣東順德
家庭：與妻子嚴小屏育有兩女
綽號：大哥、學生情人
代表作：《學生王子》、《無毒不丈夫》、《江湖龍虎鬥》
資料來源：《蘋果》資料室
