開心飛起2：北京車模試房團　330米酒店一柱擎天

香港有個393米高的觀景台即將開業，但係上一上去齋行個圈，入場費都要$150。不如回望祖國，入住全北京最高的國貿大酒店，朝朝早起床可以遠望幾公里外的人民大會堂，邊個夠我威！

記者：悠樂長
模特兒：李淋婧@ChinaBentley
鳴謝：國貿大酒店、上東盛貿飯店

81層北京最高酒店

自古以來，高度與優越感都係成正比，單睇維港兩岸的大廈，鬥高鬥足幾廿年就知。而這股越高越威的風氣席捲北京，不過這個全新最高的建築物，不是甲級寫字樓，而係五星級酒店。剛於去年8月中開業的國貿大酒店，正正就在中央電視台新樓的旁邊，樓高330米分81層，成為現時全北京市最高的酒店。從外觀設計上跟香港的國際金融中心二期有幾分相似，但設計師另有其人。而秉承着典型的「為人民服務」，酒店最高的幾層不是設計成甚麼總統套房、超級豪華套房等個人主義的房間，而係建成酒吧和餐廳等公眾場地。
先不談位於81樓的商務會議房間，因為若不是公司會議，一般房客是不會用得着。位於80樓的雲酷酒吧，乘坐升降機由地面極速上升，約40秒就到達。由於最近北京天氣好的關係，從80樓遠眺足可以看到6公里外如天安門、人民大會堂等建築物。擁有這個絕世好view，令高高在上的酒吧，即使平日下午都可以全場爆滿。

■擁有330米高的國貿酒店，明顯高人一等。

■新菜式與模特兒一樣，表現得同樣優雅。

■長腳車模李淋婧，親身體驗全北京最高酒吧，感覺堅High！

時裝、Catwalk、新食譜

時裝就話聽過分春夏和秋冬兩季推出，誓估不到連食譜都需要換季，概念來個Crossover。位於79樓的GrillSeventyNine，今個月以專業模特兒走catwalkshow，展示全新推出的春夏食譜。計我話其實大會這次的概念唔止新，仲好聰明，因為這個catwalkshow不單止展示出新菜式，仲好好利用79至80樓之間的旋轉樓梯和透明玻璃升降機，將靚人、靚景與美食融為一體。至於新食譜方面，總廚設計得小巧精緻，阿特蘭大海鱸魚、士多啤梨配藍莓雪葩碟碟都靚到唔捨得食，反而係小記意料中事，五星級酒店就有五星級的水準。