不認不認還須認，哥倫比亞歌手、性感天后Shakira同巴塞隆拿中堅碧基嘅戀情傳咗一段日子，女方日前終肯親口承認兩人熱戀，仲擺相上網曬幸福；喺意大利，柏圖亦親證同AC米蘭班主貝盧斯科尼愛女芭芭拉相戀，仲話要送意甲冠軍畀大自己6年嘅太子女訂情喎。我求大俠同看官一樣，祝福呢兩段姊弟戀可以開花結果。
Shakira認戀碧基
祝福還祝福，睇以下一句肉麻說話之前，請先做好隨時起雞皮嘅準備。34歲嘅Shakira喺twitter公開呢段戀情，仲放埋張佢同細自己10年嘅愛郎攬到實合照，曬命：「我為大家介紹我嘅陽光。」Shakira出到陽光呢個字，好明顯乘機宣傳埋最近出嘅大碟《Thesuncomesout》（英文譯名），呢啲咪係喺娛樂圈打滾多年嘅道行囉。
至於柏圖同咸濕總理兼AC米蘭班主貝盧斯科尼個女芭芭拉拍拖單嘢，接連被狗仔隊影到相；尤其上個禮拜俾雜誌《OGGI》刊登女方親吻柏圖，柏圖想唔認都唔得：「唔好問啦！家陣唔方便講，我只能夠話我哋啱啱開始，希望可以繼續落去。」
柏圖為太子女爭意甲
雖然「小鴨」21歲仔，但喺米蘭見慣世面，又結過婚，使咩扮怕醜？所以越講越放，話「想將個聯賽冠軍送畀芭芭拉。」唔止㖭，如果真係贏意甲，何止女方開心，未來外父兼咸濕總理貝老更開心。鬼咩，貝佬官司纏身，真係要搵人氹吓。
兩段姊弟戀公開，碧基除咗證明佢應該唔係「基」民外，佢同柏圖以後唔使再偷偷摸摸拍拖，對於正喺西甲、意甲聯賽榜領先嘅巴塞隆拿同AC米蘭，都係好事。