港鐵（066）話加價係根據可加可減機制，睇番港鐵高層薪酬，原來都奉行呢個原則！港鐵噚日出咗2010年年報，行政總裁周松崗（圖）整體年薪加咗10萬蚊，有成1390萬，其中基本薪金連津貼加咗30萬，但係花紅就減咗20萬，完全係有加有減。
至於曾任八達通主席嘅港鐵財務總監梁國權，雖然八達通搞咗鑊粥，但係舊年依然有人工加，年薪加咗4%到780萬。不過，唔知係咪舊年賣樓唔多，物業總監何恆光年薪減咗10.8%，只有660萬；人力資源總監陳富強就減咗4.2%，有680萬。睇真啲，原來兩位主要都係退休金供款少咗……唔好意思，都係叫做減咗o架！