自從舊年11月底台灣「五都」選舉前夕俾人槍傷之後，國民黨名譽主席連戰個仔連勝文，除咗帶住個口罩，基本上已經冇乜大礙，仲已經重出江湖，喺寶島嘅永豐金控做董事長之餘，更加涉足神州！
話說第一視頻（082）噚日宣佈，向中國人壽富蘭克林資產管理、EvenstarCapitalFund同復耀配股，籌咗2.033億港紙，佢哋嘅主席張力軍可能怕大家唔知新股東有幾勁，於是噚日朝早喺分析員會議爆料，話Evenstar嘅話事人係連戰個仔，仲話呢位連公子曾經搞過悠游卡業務。華華翻查紀錄，軍哥講緊嘅應該係連勝文……換言之，文少家係進軍中國彩票業，嗯，以佢嘅身份，都咪話唔敏感！
有國民黨頂住都未算，一直睇好第一視頻嘅交銀國際，即刻出咗份報告，維持「買入」嘅投資評級之餘，仲話公司收購咗中國足彩網之後，彩票生意已經整裝待發云云。
消息甫曝光 股價即炒上
雖然話文少本身做過瑞信、大摩呢啲大行，有番咁上下金融底，但係幫唔幫到第一視頻，暫時就好難講。之不過咁，個消息噚日下晝近3點俾某網站報咗出嚟之後，第一視頻即刻郁，收市報$2.5，升咗2.9巴仙，雖然距離交銀個最新目標價5蚊仲爭成一半，但都係國共合作嘅好開始啦！
李華華
mailto:[email protected]