圈中藝人尊稱大哥的鄧光榮，前晚夢中猝逝，死訊傳出後，他生前好友均感到惋惜難過，異口同聲讚大哥為人有情有義。
余安安微博：
還記得初出道時跟大哥（鄧光榮）拍了一部《今生今世》，他知道我剛拍戲沒多久，教我很多和照顧有加。大家都知道他很喜歡狗，他還帶了他心愛的大狗到現場玩呢。很有義氣的大哥，俠骨豪情，很突然呢！大哥，一路走好！
林敏驄：
我呢幾年都有同大哥一齊打golf，佢球技幾好，我哋從來唔賭錢，志在運動吓。每次見大哥時，佢都精神奕奕，唔聽聞佢身體有乜嘢毛病，但心臟病真係好難講，大哥走得好突然，佢畀我嘅印象係好nice，好講得笑。
周聰：
我最後一次見佢係石堅叔出殯，佢喺度幫手打點一切，佢份人好有義氣、人好好，可惜英年早逝。
惠英紅：
我噚晚聽到大哥走咗嘅消息，好大聲嗌咗出嚟，上個月先見完佢，大哥日日跑步好健康，佢性格好豪爽，講嘢好直，係真我性情。大哥知我都養狗，仲成日同我交流養狗經，佢話我成日太縱隻狗。
張敬軒
上星期去飲喜酒，都有撞到大哥同場，見到大哥談笑風生，估唔到咁樣。
秦沛：
我哋識咗起碼40年以上，近年佢熱愛高爾夫球。我只係知佢有少少血壓高，好彩個女返咗嚟，佢好錫個女，當日個女飛去美國讀書，佢唔捨得流眼淚。噚晚（前晚）收到消息打畀我細佬（姜大偉）問，原來佢已經喺鄧光榮屋企，佢份人好熱心對朋友，對家人又好。
梁思浩：
我本身同肥姐好熟，經常過時過節見到大哥鄧光榮，噚晚（前晚）九點幾係陳家豪（陳淑芬兒子）通知我。四個禮拜前大哥嚟我間酒吧飲嘢，當時佢同我講佢最近戒煙戒酒。大哥同肥姐一樣好仗義幫朋友，若果有乜佢就撐咗先，正如喺肥姐喪禮佢講嘅一番話，佢覺得應該講就講，唔會諗有冇人鬧。
張堅庭：
我識咗大哥近30年，記得早年拍《表錯七日情》曾經諗過搵佢做葉童老公，角色講佢冇仔生，要收養一個，但大哥一聽就好尷尬，佢話自己係好多兄弟嘅大哥，冇得生好冇面，最後佢都推咗冇演。大哥認識好多江湖朋友，佢份人好俠客，對人會路見不平，拔刀相助。