隔晚花旗股市造好，噚日日股又大幅反彈，畀一個大好機會好友喺期指結算日反攻，恒指大升391點，報收23451，輕微突破100日線，成交大幅增加至近900億，睇埋期指成交合約嘅變化，唔似只係挾倉，如果日股嗰邊冇大插，今日港股有機會再大幅推高。
長和系公佈業績之後股價有追捧，企喺阻力位前收市，如向上突破，有唔錯嘅上升空間。內銀股受業績支持，後市會反覆向好。
海螺C輪27598：安徽海螺（914）報收47.20元，升3.5%。股價喺今年頭兩個月表現嘛嘛，不過踏入3月份生猛番晒，反覆升足成個月，技術走勢越嚟越靚，10送5股除淨前後，有機會再炒一轉，短線睇52元，可以諗吓隻C輪27598。
隻輪現價65仙，2011年6月3日到期，行使價41.30元，溢價1.3%，引伸波幅36.9%，槓桿率7.3倍（有效5.9倍），正股升上52元，27598有機見1.07元，升幅65%，正股跌穿45.50元就沽咗隻輪。
俊樺