聯儲局前主席格林斯潘口水多過浪係人都知，近年冇做儲局主席已經叫做收斂咗，不過查實佢仍然好熱衷喺媒體發表意見。
好似噚日，格老又喺英國《金融時報》撰文，狠批美國推行嘅金融改革，話可能係美國自1971年搞薪資及價格管制以嚟，由監管所造成最嚴重嘅市場扭曲。
佢又話，舊年國會通過嘅金改法案根本係唔work嘅，甚至會危及美國人嘅生活水平咁話。不過，華華就覺得，格老呢篇文似係為自己辯護多過有實話想講，事關呢幾年，佢任內推行嘅放寬市場監管，被批觸發金融海嘯嘅罪魁禍首，家格老再發炮還擊，加埋共和黨成日都盤算點樣推翻金改法案，睇嚟美國財金界又要爆發一場口水戰。