馮仁昭四圍超：
李心潔、沈嘉偉鬼祟撐枱腳 - 馮仁昭

現年34歲嘅金馬影后李心潔同邱淑貞老公、即係I.T.王國老闆沈嘉偉，兩個睇嚟大纜都扯唔埋，但前晚佢哋各自撇低另一半去到中環嘅中國會撐枱腳，但當佢哋發現有記者影相時，仲好尷尬同好愕然咁即刻彈開，佢哋嘅反應有啲突兀。

尷尬彈開

英國超模姬蒂摩絲（KateMoss）前晚喺中環中國會食飯，引嚟大批記者追訪，前晚10點45分左右，當大批記者等緊KateMoss嗰陣，忽然見到李心潔同沈嘉偉喺中國會搭落嚟。李心潔同沈嘉偉一見記者就好愕然好尷尬咁彈開，問李心潔係咪喺中國會食飯，佢好細聲話係，其間沈嘉偉問李心潔：「你有冇車呀？」李心潔話有之後，佢哋一個向左走、一個向右走咁離開。
前晚沈嘉偉手上攞住李心潔《小黃花的粉紅包包》本書，呢本書係李心潔同老友楊采妮、梁詠琪（GiGi）以及許茹芸創立嘅點燃希望慈善教育基金推出，李心潔前晚同沈嘉偉食飯，好可能係傾贊助佢哋活動嘅事，所以送本書畀沈嘉偉睇睇。其實李心潔老公彭順同沈嘉偉老友郭富城合作無間兼且鬼咁老友，話唔定係城城介紹沈嘉偉畀李心潔識，等佢贊助好友做善事都唔定。