上周日沙田馬場有三場盃賽，就係博愛盃、中大校友會聯會盃與獅威盃，在沙圈外竟然見到馬場稀客孫柏文、利世民、獅子王等人，問肥仔孫：「捧邊隻馬呀？」肥仔孫答：「Uncle第三場有馬出！」邊隻馬佢又唔識講，於是到咗第三場用望遠鏡望落沙圈，見到肥仔孫一班人企在「紅山茶」練馬師沈集成及馬主嗰邊，但諗吓，呢場「添福駿驥」熱到1.7倍，又有隻「薄荷糖」係實力馬，初出嘅「紅山茶」唔會硬撼強勁對手呀？哎吔吔，睇小隻馬就弊傢伙，「紅山茶」在最後五十米一枝箭咁衝上嚟贏咗「添福駿驥」，何其犀利也，翻查「紅山茶」馬主叫做顏尊輝，應該係蓮香茶樓後人，好多年前有馬叫做「山茶花」、「紅山茶」、「紅紫荊」，記得係短途快馬，馬主就係蓮香嘅老闆顏同珍。
到咗第八場中大校友會聯會盃，熱門「較量」與「財運」兩隻馬嘅馬主分別係范思浩與鄭潔賢，兩位都係逸夫書院校董，鄭女士兼係中大校董，在場中大校友都話買一條「逸夫Ｑ」，唔怕信和黃志祥嘅熱門馬「快利多」。結果就係「較量」贏，范思浩捧盃，只是隻「財運」跑第四，埋唔到Ｑ，可惜也。中大校友會聯會盃自○三年起舉辦至今，第一次由中大校長識得嘅熟人捧盃（沈祖堯校長上任前係逸夫書院院長），自不然高興到極。
在沙圈內，碰到著名馬主牙醫Ｌ，牙醫Ｌ竟然唔同左丁山講馬，反而講：「你呢排做咗保皇黨噃！」何出此言？立即對佢講：「少啲情緒，多啲理性啫。」牙醫Ｌ大笑而去。因牙醫Ｌ之言，回顧最近自己嘅文字，方向冇乜錯吖。譬如自己話政府派錢市民開心，全民保障狂加稅等等，相信與主流民意相差不遠，左丁山唔認為曾俊華要為預算案下台，與泛民唱對台戲，泛民未必一定掌握多數民意嘅啫。「明報」根據中央政策組嘅外洩民調嘅問題，叫港大民意計劃做一次。結果就係54.6%市民不認為曾俊華需要下台，答需要嘅係25.8%，兩者係二對一之比，在不同行業人士之中，只有勞動工人（55%）話曾司長要下台，其實可能係憎佢增加煙草稅都唔定，泛民要憑預算案推倒曾俊華，禍及曾特首，今年睇嚟缺乏多數民意支持。