只要稍為熟識高治，都知佢係「色」途老馬，假如開拍一套英超《猛男滾死隊》，斷估主角都有得佢做；但睇佢近年背住未婚妻艾比獵艷幾乎鋪鋪斷正，好難唔懷疑佢係四肢發達、頭腦簡單。好似近排佢喺杜拜摸上空姐房，就幾乎一身蟻……
話說上月熱刺喺歐聯對AC米蘭前，領隊哈利列納拉大隊去杜拜備戰，諗住呢個回教國家規條多多，球員唔會亂嚟啦，咁就超錯！班衰仔某晚喺夜店花6萬鎊豪飲香檳，請埋在場嘅女士，之後當然各自搵「餘興節目」；高治就同當晚搭上嘅22歲挪威空姐杜妮絲維特，開完P跟手去女方住嘅宿舍。
假名登記慌死人知
嗰棟宿舍係由女方所屬嘅阿聯酋航空公司，提供畀1,000個員工，入門口需要登記；高治想覓食又怕死，衰到登記時將自己個名寫成「PeterJohnson」，諗諗吓至劃去Johnson寫番Crouch，但字體好潦，慌死人知係佢。高治上到房後，怕且諗清楚唔對路，加埋此行一直被CCTV影住，好易斷正，結果逗留10分鐘就鬆人，據講應該做唔到佢想做嘅事。
高治懸崖勒馬絕對正確，原來當地有法例，唔容許外籍未婚伴侶住喺同一私人空間，包括住所同酒店，否則面臨重罰，最嚴重要踎監；高治離開時大概凌晨3點，仲要俾人查咗一陣至走得。好彩女方幫口，話佢上房只係想拎番啲嘢，兩人只係普通朋友，逗留一陣就走，唔係高治就一身蟻。
高治兩周前榮升老竇，計番日子，當時佢係趁未婚妻艾比大肚想外出覓食，衰到貼地。睇番佢舊年已被揭發瞞住未婚妻嫖妓，後嚟又被影到喺法國夜總會醉酒尋歡，為吸引異性不惜跳機械舞，又借醉向在場女士毛手毛腳。賤男稱號，走唔甩囉。
