自從何韻詩開完網上LiveConcert之後，最近YouTube亦搞咗個明星專屬頻道「MyYouTube」，俾網民公開投票，仲令到網上拍片熱潮再復活！你都想做網攝王開騷，唔理器材幾平，只要夠幽默、夠搞笑，分分鐘紅過巴士阿叔。
記者、攝影：王震遠
Model：JoJo@FameEntertainment
iPhone+Webcam 即拍即上
日本大地震後，唔少企業爭住出嚟搞捐錢，何韻詩亦出錢出力為災民籌款，仲喺網上大搞賑災音樂會。新城電台DJ科林說：「我覺得幾好！其實佢喺網上搞都唔係第一次，佢周不時喺網上同人搞吓互動，佢好識喺大趨勢時做一啲啱方向嘅嘢。」要自己拍短片，唔一定要有貴架生，一部手機已經開到騷，「家用iPhone4拍嘢，仲多過Handycam，iPhone4畫質同收音都OK，係衰在輸出格式唔方便喺PC度用。」有人用Webcam坐定定吹水，一樣大收，證明絕對唔係器材先決，「拍電影就講究器材，網片最緊要有橋，同睇你有無心去做，好似何韻詩就咁對住電腦用心唱歌，係好簡單，但大家都好支持。」
拍笑片易彈出
以前興網上開咪，家就興網上拍片！搞咗個《百萬USB》頻道嘅科林，點睇家嘅網攝王？「有啲淨係影住個樣齋講，有啲會製作短片出嚟俾人睇，我覺得後者幾用心。一啲齋拍出嚟又噏好多廢話同粗口，真係粗鄙咗啲，但有啲講嘢有Point都OK嘅。」唔少網友嘅作品，科林亦有留意：「有啲Production真係用心去剪接，我以前睇過Eminleo啲嘢，另外前排仲有粗口叮噹，唔係話佢哋好定唔好，但真係好有創意。」
現今網民大部份都係年輕人，口味勁飄忽，要佢哋Click你條片？好難捉摸！「家啲年輕人好難捉，有時要反思想，可能好正路又啱佢哋，好難講！」科林說：「喺我角度，搞笑係會吸引啲，我自己做就會做啲搞笑同玩嘢啲嘅短片。」
人人做DJ
現時清談節目已唔再係主流電台專利，人人都可化身DJ。「網上做騷吸引人嘅地方，係可以面對面！」傳統電台將數碼化，網上世界早已先行：「Justin.tv為例，佢哋會對住個芒講，然後就叫觀眾畀意見，因為喺LiveChat可以有即時反應、同人互動。」
要喺網上做Live騷，主流有Justin.tv同blogTV，同YouTube相比，性質上有啲唔同，「Justin.tv俾人玩音樂，YouTube係俾人做Promo嘅地方同無時間性嘅嘢會啱，如果我喺Justin.tv搞節目，會先喺YouTubeShare條Trailer。」科林仲認為一定係令人期待嘅嘢先好去Justin.tv度搞：「如果我幾時睇都得嘅話，點解唔去YouTube睇呢?!」
網上奇人組
深藏不露組
明星過界組
