日本核危機繼續困擾金融市場，噚日區內股市普遍偏軟，港股都反覆跌咗90點，收報23068，不過喺20日線出現十字星形態，成交縮，都算技術靠穩，只要外圍轉好，恒指仲有機會上試23300阻力。
港股禮拜三就期指結算，市況會跟隨外圍出現較大嘅波動，大家炒即市要特別留神。內銀股炒完一輪之後趨個別發展，個別股份整固後可以再升，市場焦點開始轉至內房股，不妨睇多兩眼。
潤地C輪27479：華潤置地（1109）噚日收報13.64元，升2.7%。股價上周由低位回升，喺50日線橫行咗幾日，噚日破關而上，成交增加，好大機會突破位處13.88元嘅100日線，再推向14.78元，可以諗吓隻C輪27479。
隻輪現價13.4仙，2011年10月28日到期，行使價14.50元，溢價16.1%，引伸波幅42.7%，實際槓桿率4.8，正股升上14.78元，27479睇19.6仙，升幅近5成，正股跌穿13元就沽咗隻輪。
俊樺