警隊O記（有組織罪案及三合會調查科）位於灣仔警察總部嘅大本營噚日好熱鬧，一哥曾偉雄帶隊，同多個大Sir齊齊現身，連已退休嘅前副處長任達榮、馮兆元都有露面。O記晒冷，如此墟冚場面，據講近年難得一見。八方收到風，原來O記一眾夥計噚日拜關二哥，慶祝破咗殺泰龍呢單大案，所以請埋幾代O記阿頭嚟還神。
擇吉日切燒豬
O記老友同八方講，雖然殺泰龍案偵破咗好一段日子，幾名兇徒已繩之以法，但由於拜關帝要擇吉日上香切燒豬，所以噚日先還神；佢又話O記查呢單案偵騎四出，眾多夥計花咗好多工夫先破案，因此阿頭決定拜關二哥同時激勵士氣，希望關二哥保佑，可以盡快將在逃主腦緝拿歸案。
老友又稱由於任Sir做過O記阿頭，退休前好關注佢哋查大案，所以噚日請佢返嚟高興吓；而馮Sir當家時落實好多德政造福O記夥計，被好多後輩視為偶像，O記慶功，梗係要預埋佢老人家啦。曾偉雄都做過O記阿頭，拜關帝唔使叫都要嚟咁話。