今年2月先離任嘅前白宮發言人吉布斯（RobertGibbs），本來一直計劃幫舊老細美國總統奧巴馬搞埋競選連任之後，先去私人機構搵真銀，點知《紐約時報》近日就爆料，話佢可能去社交網站facebook（fb）返工。
篇報道話，fb計劃喺出年搞IPO，預料會成為股壇當紅炸子雞，甚至係史上最大IPO，所以財金界對佢哋嘅一舉一動，都非常關注。近期有指fb嘅估值已逾600億美元，為咗令上市做得好好睇睇，公司覺得有需要請個公關猛人坐鎮。
據估計，吉布斯入fb嘅人工會係數以百萬美元計，雖然細節未傾掂，但聽講可能仲有得分股票。不過，由於吉布斯原本想專心幫奧巴馬搞好出年個大選，所以家陣仲心大心細。相反，近期因為網上私隱及資訊保安問題，成為美國國會議員及傳媒抽秤目標嘅fb，就好想吉布斯呢類公關界高手幫公司擋駕，所以好想佢老哥快啲做決定。