性格豪邁奔放嘅建行（939）董事長郭樹清（圖），雖然唔係成日嚟香港，但每次出現都不乏金句，噚日主持業績後記者會，佢除咗感激媒體詳盡分析外，又特別作出個人鳴謝，皆因報章每次刊登郭董嘅照片，都係佢「最好睇嘅」，「影得唔好嘅都無用到」。嗱，貪靚唔係女性專利o架。
舊年建行供股集資600幾億人仔，被本地報章稱做「抽水」行動，雖然郭董初期唔係好習慣，但經佢老友──前金管局總裁兼建行非執董任志剛解說後，郭董頓然覺得「抽水」好親切。
噚日佢又提起呢鋪A+H供股力作，仲大讚曾任首席財務官嘅副行長龐秀生議價能力高，令安排包銷嘅投行收費唔高，建行嘅成本對收入比率，亦因此非常叻仔，可以降低咗1.79個百分點至僅得37.25%。