有無諗過自己架車極限有幾多公里？會守護你幾多年？德國人GuntherHoltorf自1989年便與他的300GD為伴，履行環遊全世界的宏願。屈宿G驅蝸居22載，走了73萬公里路的戰績更準備列入健力士世界紀錄。今站來到香港，當然要把握機會窺探一下呢部精壯嘅神奇G驅！
記者：許維雅
攝影：陳陶鈞（部份相片由被訪者提供）
場地提供：淺水灣酒店影灣園
Iwillbethere!
每個人發白日夢時總會幻想到某些天方夜譚的宏願，但有幾多人夠勇氣及膽量去實踐？Holtorf單憑一句：「Iwillbethere！」展開他的環遊世界夢。年輕時做過飛機師，之後當上航空公司經理，曾被派到多個國家擔任管理工作，「以前成日搭飛機，每次喺飛機望見世界各地嘅靚景，我都同自己講，有朝一日我一定會踏足呢個地方。」
1989年他揀選了平治越野車300GD作為拍檔，「當年我用咗約三萬歐元買部新車，開始計劃旅程，一揸就22年，無換過車。當年我相信300GD嘅能力，皆因佢係為加拿大軍隊生產，品質用料都好，有一定可靠性同耐用性。」究竟架車點好？他打開車頭蓋，叫我托吓有幾重。一托之下才發現記者原來真的無能力托得起，他更親身爬上引擎蓋行來行去，亦不諱言當年汽車鋼材用料確實比新一代汽車更勝幾籌！
堅持不住酒店
問Holtorf為何不選另一越野車王LandRover，他直言：「LandRover嘅懸掛感覺太搖，揸得耐令我腰痠背痛！」雖然今年已73歲，但Holtorf像個老頑童，落力為大家介紹他的G驅蝸居，爬上爬落興奮拍照，經常講半鹹淡廣東話逗記者開心，即使短聚個半小時，也感受到他的熱誠從未冷卻，那份魄力依然存在，這正是他投入旅程的主因。
他駕着300GD走遍南北美洲、澳洲、歐洲、印度及中東等國家，他堅持不住酒店，盡量屈宿G驅蝸居，全因他熱愛露營，盡量感受每個國家最真一面！當日跟記者做完訪問，他即離開酒店失去聯絡，可能去了落馬洲露宿！
最佳的耐性訓練
大企劃亦將接近尾聲，預計2012年完成，這戰績不止會申請列入健力士世界紀錄，更會將呢部經典G驅收藏於德國斯圖加特的平治博物館。Holtorf的宏願得到肯定，不得不佩服他多年來的堅持，儘管毅力驚人，相信另一半的信任、支持和體諒才是最大動力。
一開始陪着Holtorf走的是他太太Christine，可惜她去年不幸離世，「我腦海只諗住餘下每個站，心裏只有一個目標，就係完成計劃，最傷感嘅係我太太唔能夠同我一齊完成，不過佢話會坐喺第17號雲望住我。」充滿浪漫的婚姻生活，可以跟老公遊歷世界每個角落，有機會一齊堅持同一個夢想，其實Christine已無悔今生。
現在由仔仔Martin頂上：「喺我眼中加入頂替媽媽係一件好自然嘅事，因為企劃已成為FamilyProject。唯一要面對嘅係學習妥協，兩個人一日24小時對住，一定有爭辯，仲要困喺架車度無得走，所以更要懂得退一步互相諒解，今次係訓練耐性嘅機會，呢啲都係媽咪教我嘅。」相信兩父子在Christine的庇蔭下，必定可好好完成這壯擧。
最難忘聖誕 圭亞那
大家一定以為他們最難忘的聖誕會發生於浪漫國家，兩公婆偏偏驚餐飽，「有年聖誕前夕，我哋去到南美洲Guyana圭亞那，點知嗰晚架車跌咗落泥坑，被爛泥食住咗行唔郁，最慘係萬里無人，想搵人幫手都好難。我哋德國人好重視聖誕節，所以好心急想走。好彩第二日竟然有人經過幫我哋，趕得切去咗條小村慶祝聖誕。呢個經歷由唔開心變開心，印象好深刻。」
最驚險國家 非洲
好多人聽到非洲就怕怕，若然要露宿森林沼澤，蛇蟲鼠蟻奇珍異獸四處都有，有幾多人會夠膽？「要數到咁多年來最難忘嘅經歷，我話係非洲津巴布韋。有晚綁了張網床瞓覺，到半夜感覺到有人望住我，於是我拉低少少網床望出去，我同隻鬣狗近距離眼望眼，嚇死我！原來有堆鬣狗喺我身邊，嗰種驚險到家都仲記得。你知啦，鬣狗喜歡死屍，我大叫一聲，等佢哋知我唔係死屍囉！」
自駕遊首注意賊仔
留宿車上較安全
盡量於車上留宿，最好二人同行，即使行開買補給品都有人留守，否則好易被人偷嘢。另外當部車係家，必要定時清洗呢！
出發前檢查及維修
路線規劃好重要，知道下一程要行幾遠，之前就要喺鬧市搵定車房檢查及更換耗損零件，途中荒山野嶺要搵人幫忙就大件事。
車越舊越易整
22年前出廠的300GD，引擎結構及設計偏向機械性，維修都相對簡單，反而新一代汽車加入太多電腦軟件，增加維修難度。
隨時攀山涉水
打算到非洲或南美洲等自駕遊的朋友，隨時遇上攀山涉水情況，只有越野四驅車才可勝任。
學懂簡單維修
路途中難免遇上汽車失靈，最好了解些少基本維修知識，如換燈泡及火嘴等簡單工夫。
群體聚腳增安全
去到荒郊野外，若然遇上同道中人，不妨集中聚居露宿，增加保護作用及安全性。
