「股壇長毛」DavidWebb（圖）一向撰文呼籲小股東投票反對上市公司嘅建議，噚日竟然一反常態，呼籲小股東投贊成票。原因好簡單，就係因為呢間公司嘅建議，符合晒Webb嘅理念囉！
Webb自03年發起「殭屍行動」，呼籲小股東投反對票，拒絕讓上市公司每年取得發行兩成新股嘅一般授權，如果公司要發行新股集資，上限應該係5%，折讓幅度亦唔超過5%。
下個月舉行股東會嘅港交所（388），7年嚟首度建議發行5%新股集資，計埋唔集資部份，亦只係發行10%新股，折讓幅度為5%。Webb大讚港交所樹立好榜樣，旗下聯交所更應該舊事重提，就呢項一般授權修改《上市規則》。