碧咸黑腳？效力洛杉磯銀河嘅英格蘭中場「萬人迷」碧咸，喺上周六作客皇家鹽湖城嘅美職聯，兩年多以嚟再次戴起銀河隊長臂章；點知好衰唔衰，因為自己夢遊球場，閒接令球隊被鹽湖城炒4:1，開「咧」不敗告終。碧咸冇面之餘，對於自己一時魂遊，亦晒頭。
1:4敗走鹽湖城
由於碧咸嘅銀河隊友當路雲要喺上周六代表美國踢國際賽，所以碧咸終於恨到，可以兩年多以嚟再做銀河隊長；不過，佢同隊友喺作客去屆西岸亞軍嘅鹽湖城一役，表現就認真麻麻。
面對有多名主力去咗踢國際賽嘅鹽湖城，銀河喺開波10分鐘就落後0:2；喺完上半場前4分鐘，鹽湖城嘅查維亞摩拉利斯，仲喺界外球攻勢，趁碧咸夢遊，擺脫咗佢之後離門20碼勁射入網，而銀河就最後輸1:4。（ http://www.youtube.com/watch?v=SSbtdVeRSXM）
賽後碧咸就將大敗歸咎於開波好早就失咗兩球，完全冇提自己魂遊一事；呢名35歲嘅中場話：「我哋開波初段唔集中，結果好早就失咗兩球；呢種情況無論係對住乜嘢對手，都好難踢，更何況係對住鹽湖城呢？」
至於銀河教練艾連拿亦話：「球隊喺初段表現接二連三犯錯，表現咁差，就算輸0:2嗰球我唔認同係12碼，但我都覺得己隊真係抵輸。」
唯一慶幸安祖開齋
不過，艾連拿亦兜番，話球隊喺呢場重創並唔係完全冇得着，因為除咗起碼知道球隊有乜弱點外，今季新加盟嘅星級射手安祖亦喺呢場開齋；如果安祖keep住呢個狀態，配合埋當路雲歸隊，以及傷兵好似奧馬干沙利斯等復出，銀河始終係今屆西岸擂台躉。