港鐵盈利滿瀉仲要加價，搞到全城天怒人怨，有網民設計咗個「港鐵霸權」Logo（圖），諷刺港鐵賺到盡，榨乾榨淨小市民血汗錢，無良程度拍得住地產商。環保觸覺主席譚凱邦（Roy）大讚網民有創意，夠晒一針見血。佢打算用呢個Logo，喺facebook成立港鐵霸權關注群組，召集志同道合人士一齊對抗呢個新興霸權。
阿Roy鬧爆港鐵唔只無企業良心，呢十幾年嚟仲要不停起發水樓，衰過好多發展商。政府收緊發水樓措施呢個星期五就生效，但港鐵一於話之你，喺天水圍輕鐵站新住宅項目繼續發水，阿Roy今日下晝會同公民黨黨魁梁家傑喺立法會門外開記招，踢爆港鐵惡行。