東瀛核電廠漏輻射，搞到香港「盲搶鹽」，本地民智成為笑柄！華華前幾日同幾個「賓架」食飯，講起呢個話題，佢哋話頭個星期，由於要study呢次世紀天災帶嚟嘅問題，根本冇時間諗有咩必需品同食品要入定啲貨，到前幾日有機會唞一唞，先醒起要入番啲生意應酬必備嘅日本酒。
華華冇蝕底跟埋去八卦，佢哋唔係掃清酒喎，而係掃一隻產自仙台、Nikka廠出品嘅Miyagikyo宮城峽威士忌（圖）。點解？Well，據老友講，第一，呢隻酒喺後生一輩嘅「賓架」界別幾受歡迎，餸串燒或者雪茄都啱；第二，仙台間廠已經被海嘯吞噬，所以要趁手買番啲嚟看門口！說時遲那時快，大家嗱嗱臨一人掃咗4支12年嘅酒，之後諗諗吓行返轉頭想要多幾支，已經無貨，老闆話畀幾個「芬佬」買晒。老友話，囤積居奇都要囤得其所，一支12年嘅賣1300蚊左右，就算唔飲拎去賣，斷估都有價有市！