專制國家如中國，政府無甚透明度，大小官員貪污，不足為奇，但在東南亞、拉丁美洲，唔講非洲咯，民選民主國家甚多，貪污風氣同樣盛行，而且一啲低級官員公開收錢，膽大包天到極，即係明知無人理會，唔駛驚啦。歐洲又如何，貪污雖然冇咁猖獗，若干官員同樣收特殊利益，在意大利、法國屢有所聞。與中國一齊崛起嘅印度又如何？印度有十億人口以上，係全世界最大民選國家，政治制度跟足英國，政黨輪流執政，軍隊嚴守政治中立，不比巴基斯坦軍人揸槍出政權。最近睇「金融時報」、「國際先驅論壇報」、「華爾街日報」等，得知印度貪污嚴重，可能涉及現任政府高層，醞釀政治危機。睇起嚟，香港與星加坡之廉潔算係異數。
大抵一個國家/地區，政府管制、規劃範圍越多，越嚴，貪污嘅機會就越大。張五常教授在八十年代寫過，在經濟管制太多國家，依足法規做，商人沒希望，貪污就變成潤滑劑，官員收收銀，瞌瞌眼，放生商人一面，經濟反而得到發展。民主解決不了貪污，如因民主產生民粹主義，堅持打擊「奸商」，嚴加控制嘅話，貪污更加容易滋長。香港勝在政府積極不干預，管制少，官員權力不太大，商家做生意不需政府呢樣嗰樣同意，貪污咪少啲囉。印度有太多社會主義式管制，叫姬達爵士去印度建立一個百分百香港式嘅廉署，一樣無助遏止貪污。
讀者Ｂ來郵批評左丁山，但佢第二次來郵所提及嘅觀點，左丁山係同意嘅，讀者Ｂ講到香港依家有太多牌照要攞，譬如建築工人、地產經紀、看更等都要攞牌，管制過嚴，搞到有人想做工亦不可得，食環署又收到太多市民投訴，左拉又拉，連街頭商販亦搵唔到食。讀者Ｂ其實觀察咗一個趨勢，就係特區政府為咗追上不知甚麼潮流，引入太多歐洲式監管、歐洲式政策（平機、私隱、最低工資），令到好多中小企及個體戶生存困難，創業維艱，依家又講競爭法，泛民提全民保障，一旦成事，香港嘅營商環境更加困難。喂，人地歐洲有「公義」喎，係囉，歐豬國，英法嘅經濟又點呀，一潭死水，青年人更無希望呀。人地已經俾所謂公義搞到彎彎咯，香港仲要學？