馬雲嘅淘寶網對唔少香港人嚟講，應該好熟悉，因為好多人都鍾意喺度淘吓飾物同衫褲鞋襪呀咁，家個網仲發展到連汽車保險都有得賣㖭！平保（2318）同淘寶網簽咗合作協議，淘寶用戶以用戶ID就可以投保車險同交保費。
平保話，呢個投保模式喺業界屬破天荒第一家，標誌住保險業喺電子商務模式上嘅重大突破，據了解，中國平安官方旗艦店嘅車險投保功能喺淘寶網登錄之後，投保人唔單止可以投保交通意外保險、國內旅遊保險、境外旅遊保險等意外保險，仲可以投保平安官網上嘅車險。
為咗吸多啲客，平保叫大家放心，透過呢個渠道賣嘅保險，保證畀最高嘅折扣率……in係夠in，但咩折扣都假，如果華華要幫襯，第一樣係考慮安全同誠信！